自律做功課同執書包

諗返岩岩升小學既時候，因為突然間多左好多功課（其實只係多左1-2人份），老婆就大為緊張。佢返到屋企，見個仔未做完D功課，就會興師問罪，做乜搞咁bababa😂，然後就會講啲字咁核突，結果可想而知，一個擦擦擦，一個喊喊喊，然後好辛苦咁做晒書包都未執左去瞓覺。如是者，我靜靜咁睇左一個禮拜😂，靜觀其變。

結果係
歷史不斷咁重複，我忍唔住同老婆講，嗱，你教咗一個禮拜，下一個禮拜輪到我出手，希望我出手個時，你可以同我一樣靜靜咁睇係一個禮拜。

結果，我接手三日後，個仔已經可以好快咁做晒功課，一個禮拜之後，自己可以放好曬啲功課入書包等我哋簽名手冊。

諗返嗰時，真係好有趣的體驗，所以要記番低。

頭幾日，返到屋企，我仔話好攰，功課未做曬，隻眼望住我，應該係想我幫手。點知我望兩下，同佢講，其實小學係咪好多功課？係唔係好辛苦？如果好辛苦就唔好做。
佢望住我冇出聲。然後我再問，不如我幫你手啲功課入去書包，辛苦就唔好做，爸爸覺得無所謂。然後佢同我講，老師會鬧，唔可以唔做。我答佢，我幫佢寫手冊，幫佢同老師解釋遲一日交，因為瞓覺對小朋友係重要啲，就嚟到瞓覺時間都未做晒，老師會明白的。然後我搶左佢份功課收埋推佢入去瞓覺，點知佢喊住走返出嚟話佢一定要做曬，之後好明顯我一返到屋企佢已經做好晒功課，唔比機會我幫佢解釋。

之後3日，我同一齊佢對功課，第一日我幫佢擦左我覺得唔可以接受嘅字，然後同佢解釋點解唔可以接受要擦；第二日，我叫佢自己擦；第三日，我叫佢話俾我聽邊啲字應該要擦，然後叫佢自己擦。

最後嗰日，我叫佢自己執書包執好先可以入去訓。

一個禮拜之後，我老婆睇完晒同我講以後個仔我教。

其實我同佢講我都係想比佢教先，有問題我先再出手。希望佢唔會睇得出背後嘅原因同個仔做功課嘅原理一樣，哈。