寫字醜樣的問題

個仔寫字嘅問題一直困擾着我們兩公婆，他已經成為了全班有可能是全校寫字最醜樣的學生，其實醜樣都唔緊要，問題係有時真係完全睇唔清楚佢寫什麼。

我一直懷疑係幼稚園時寫字太少，佢讀幼稚園嘅時候真係好鬼開心，字都唔使寫多隻，搞到依家寫多兩隻字已經話好攰唔想寫冇心機，
其實一日得兩三份功課，如果咁都冇心機真係冇辦法，如果讀傳統嘅學校日日每日有十份八份功課咪死得。但係始終都冇實質證據證明細個時寫字少，大個寫字會醜樣，所以一直都係懷疑。

咁唯有幫佢諗解決方法，最後買咗本練習簿每日叫佢寫一版，本練習簿幾好，啲墨水寫完會由藍色字變返透明，然後可以係同一頁再寫過，真係好鬼特別。但當然個仔係唔會理我，寧願睇書都唔寫，睇住佢寫寫兩隻字就話好攰，真係耐性少啲都俾佢激死。

最後諗左個絕招出嚟，我話其實寫字會越寫越快，之後會少一半時間做，然後問佢信唔信。佢好懷疑，然後我同佢講，嗱，我哋做一個實驗，當你開一版嚟做嘅時候，記住計時，如果時間係用5分鐘30秒，你就喺月曆個格仔上面寫低5m30s，每日記錄同一版，然後我哋一個月後睇返時間會唔會跌到5分30秒以下，持續地下跌，直至有一日可以用一半嘅時間完成。

似乎個仔係聽完之後，好開心咁同意左，然後去瞓覺。等去瞓覺之後，老婆話我咁古惑，欺騙小朋友，我同佢講，以後我地可以問佢實驗個結果有冇快咗，而唔係問佢今日有冇練字，感覺好唔同。