最近個仔學校第三次面試，令我諗起兩年前同一時間阿仔都係喺度面試，而咁啱我又係出咗trip，陪唔到個仔對面試，只有老婆孤身作戰。
一到面試，就會有朋友打電話來詢問面試啲嘢，我又聽老婆分享多一次。
第三round，佢話面試係副校長，
其實主要係問個小朋友，問吓佢讀邊間幼稚園呀，入去做啲乜嘢啊（我個仔回答入去幼稚園玩），問吓佢入去有咩玩呀（佢開始形容幼稚園有乜嘢玩），話題係環繞小朋友生活入邊啲嘢去問，之後有問到參加啲比賽，如果輸咗佢會點呀（個仔回答輸咗唔緊要咪再黎過囉），
#輸左咪再黎過
然後問佢平時做乜嘢，最近有冇睇書睇緊邊一本，其實個仔都答唔到，咁多本書點記得睇嗰邊一本，好彩佢問多句有冇睇三隻小豬呀，而啱啱我有同個仔睇咗同講左依個故事。
然後個仔就好流暢咁講咗呢個故事，可能歷歷在目，到最後隻灰狼跌咗入煙𠧧入面，然後跌咗落玩大湯鍋𥚃，到呢度其實都講完，咁副校長就問，咁隻灰狼跌咗落大湯鍋裡，啲湯點算呀？（佢答啲湯唔飲得啦）
睇落其實問一啲好簡單既野，但當中，小朋友面對事物嘅態度，表達能力，同一啲常識，都係不知不覺咁了解到。
聽佢講嘢實在好感人！
---
今晚食飯主要係問個仔考試考成點，因為已經考完所有科目，叫佢估下邊幾科最高分，點解咁估；邊幾科最低分，又點解會估低，然後聽佢分析評估自己，又覺得佢講得頭頭是道，好有道理。
然後我同佢講，咁我哋一齊等出咗成績睇下估得啱唔啱。（我以前考完試都鍾意計下自己幾多分睇吓準唔準，計分事嘅時候你會自己諗一次，邊啲係肯定邊啲係唔肯定）
其實我咁問，想睇下佢有幾了解自己，正所謂
知己知彼！
沒有留言:
發佈留言