沉迷金庸．多閱讀≠寫作好

自從上一次書展買咗個Kindle Paperwhite 之後，將全套金庸放進這電子書裝置裡，個仔睇金庸，可以用四個字形容「廢寢忘餐」，等車嘅時間又睇，等lift嘅時間又睇，簡直用盡每分每秒。

Paperwhite 最令我鍾意嘅兩樣嘢，就係強烈嘅陽光照射之下，啲字仍然睇得好清楚，同埋有啲英文書有word wise功能，可以係一啲較深嘅英文書入邊啲詞彙，詞彙上邊，有一些字體細小嘅翻譯，方便讀者了解，更可自行加多或減少有關翻譯功能。

講咗好嘅地方，當然世事嘅嘢往往未能盡如人意，唔係講電子書，係講自己個仔。

多閱讀≠寫作好

像身體一樣，你食得多嘢不等於你吸收好，不等於會大大隻隻。身體大隻健康，除咗食得多均衡營養之外，仲要有適當嘅休息同埋運動去支持。

個仔對於寫作，或者簡單啲寫字畫畫，完全沒有興趣，冇興趣嘅嘢點都唔會做得好，最尾都會馬馬虎虎簡單了事，完成左就算，令人擔心。

所以又要開始我嘅實驗，又搵幾樣野試吓，希望佢會進步，最後都希望佢自動自覺，點樣令佢有興趣呢，我都要研究下先。

有興趣就會做得好！

沒有暑期作業的暑假

本來想寫暑假活動例如新加打泰拳咁，但暑假開始嘅第一日，個仔只是用了半個小時睇下書咁，其餘時間就係玩、打機、睇電視，就咁過左一日⋯然後我當然忍唔住⋯

我問佢：「你唔使做暑期作業咩？」

個仔答我：「沒有暑期功課，只有睇書。」

我驚訝地回答：「咁要快點同你轉校了，邊有理由學校冇暑期作業做㗎，咁個暑假咪無所事事。」

我個仔知道我講笑，只是笑了一笑。

俗語都有講：勤有功戲無益。

本來暑假玩係好應該，但係玩得太多，好明顯係一個問題。

我記得老師曾經同講過，叫小朋友自己寫時間表，自己安排時間。講真，我自己都唔會想寫，冇理由迫個仔寫。

然後我用了我自己接受到嘅方法教佢，我會叫時間切餅法，將時間好似蛋糕咁切成三大份，分別係：打機玩樂、讀書學習、運動社交。

接着我同個仔講：無論你鍾意做邊一樣，你三大件餅，用嘅時間都要一樣。即係你用一個小時打機玩樂，讀書運動也同樣需要用一個小時去做。如果你想增加打機玩樂時間，其餘兩樣也要相應增加。為了令時間更加好用，這三大件大餅，可以切碎，分散在一起，但總時間要是一樣。

結果係點呢，第一日，個仔嘅切餅技術一般，有大有細，當然是玩樂時間切得太大件，然後我再細心指導佢管理方法。如是者過了一個星期，切餅的技術，進步了不少。他開心時，我也會覺得安心。

希望你珍惜善用時間，一寸光陰一寸金。

小四學習小結

之前寫開繼續寫埋，參考返之前小三學習小結格式⋯⋯

其實考完試，我無乜嘢想寫，應該係輕輕鬆鬆放暑假嘅時候，個仔最近已經在玩6x6扭計骰，4x4,5x5,五角形的扭計骰全部都學會了，向6x6 進發。

科技方面，而家做了youtuber，自己建立自己頻道，完成了第一個自己喜歡的影片。其他的我無留意，所以不寫了。

睇書方面，數量一年一定有幾百本，沒有計算了。

中文書睇衞斯埋、金庸小說既倚天屠龍記；英文書睇Harry Potter、The Maze Runner。D書好厚，所以重質不重量。最厚的書主要受到電視電影的影響而看的。

今次又寫一寫考試成績，雖然我已經沒有參與了，只係事後睇返。

校外ICAS考試，數學Top 2%，英文Top 9%，科學Top 6%。

校內成績最好一直都依然係數學、然後音樂、體育。

然後到英文，錯得太多Grammer同句子結構，影響writing分數。

最後到中文，寫作進步了。

校內同學藏龍臥虎，要突圍而出，十分困難，除非加緊腳步，但這不是我的目標，我也不會這麼要求。

我開始教他看書時找尋好字好句，在過程中與他一起尋找分析，才發現他不懂得及不明白如何界定好詞語及好句子。

希望他在中英文寫作上更進一步。

去做運動，下次續寫。

小兒談小學面試

最近又有人問學校面試既野，其實每次都聽我或老婆分享，我也有點悶。

今次我主動邀請個仔分享他記憶中的小學面試及其心得，在短短半個小時對話中，了解更多我平時沒有注意到的，十分有趣，總結如下：

小學面試注意事項：

． 最基本的就是有笑容、有禮貌
． 要有反應，即使遇到不懂的事情，也不用害羞，主動說不懂，及請教老師是怎樣讀，或是什麼意思，考核你是否願意學習
． 懂得和其他小朋友玩，透過玩飛行棋或其他棋藝，考核你是否有耐性、是否懂得分享和溝通
． 要投入玩樂過程，會播放YouTube，觀察小朋友投入程度
． 課室內如有書本，也會考核小朋友會否主動看書，若是被問及，平時喜歡看什麼書的時候，都能講出書名或故事內容，就非常好了

其實學校深信，每位小朋友都有他獨特之處，要從面試生突圍而出，在面試時，需要聽從指令之餘，其次是要主動，例如舉手答問題，也要表現出積極性，給老師留下一個深刻印象。另外還要投入玩耍，小孩在玩樂時，就自然流露出最真實的一面，欺騙不了的，所以平時的言行舉止真的要一致，否則一露出馬腳，就無望第二次面試了。

個仔今次用舉手答問題作例子，他深入解釋一個舉手的學問，令我印象深刻：

個仔不斷用問題去令我思考：你通常舉手如何舉？你覺得每個小朋友都舉手搶答題目，老師會選擇那些小朋友回答？你覺得你這樣舉手，老師會選擇你的機會大不大？

問完一連串問題後，他仔細說明一個普通的舉手動作，也包含著一些學問，只要舉手時不要動也不動，手部要有揮動，👋🏻，像與別人招手邀請一樣，被選中的機會率便會大大增加，你有多機會表達時，成功率也同樣會增加。

再續教育改變人生：一技之長

昨天與一個舊同事吃飯，他中五畢業後因為成績嘅問題不再升學，他吸引我嘅注意的不是他很勤力和熱心幫助同事，而是他十分專心鑽研自己嘅興趣。

畢業後他找到自己當時的興趣：日文。在工餘時間，他不斷進修，最後考到最高級別嘅一級（日文考試分為１級、２級、３級、４級和５級五個級別。１級為最高程度。）

當時的他，順理成章地轉到一間日本公司工作，人工三級跳，也找到一個可愛的老婆，結婚後也有兩個可愛的小朋友，人生似乎係一帆風順事事順利。

可惜日本文化熱潮嘅退卻，韓國文化嘅興起，他工作的日本公司不斷裁員，最後他也失業了。雖然他最後也找到另一間日本公司工作，但人工大幅下跌，生活迫人，最後因為可以多兩千蚊人工轉去另一間港資公司工作，正式地跟他常引以為傲的日文畫上句號。

為咗小朋友既生活，他還繼續奮鬥培養另一種專長，在星期日放假時兼職幫人驗新樓，他很高興說已經完了15個新樓嘅單位，希望可以累積100個單位嘅經驗，自己又可以成為一個有經驗嘅師傅，或者有機會成立公司繼續這份專業。

講到底，其實呢啲門檻咁低係人都做到嘅一技之長，希望佢可以明白，如果佢冇能力加以改進，精益求精，佢將來嘅生活可以預計到繼續迫人。

希望佢嘅勤力與態度可以令佢好運。

教育改變人生

一個小故事，教育改變人生：

我家，有我和我細佬2兄弟，我雖然小時懶散，大時卻讀書比較勤力，公開試都唔低份，可順利入讀香港嘅大學。而我嘅細佬跟我剛剛相反，雖然有點小聰明，小時不錯，但大時卻比較懶散，愛打機同玩樂，咁當然考公開試就失敗左。

那時屋企有兩個不同嘅聲音及意見：爸爸覺得讀書不太重要，反對細佬繼續讀書，應該學返一技之長傍身，讀唔到書就唔好浪費時間，早啲出嚟社會做嘢；至於媽媽十分贊成繼續讀上去，但係沒有意見如何繼續升學。

最後細佬為咗可以繼續讀書，搵咗好多不同嘅資料，最後決定到外國升學。

咁結果係乜呢：第一份工，因為外國升學嘅緣故，有個外籍老細請了他，因為容易了解，同聲同氣。第二份工就係第一份工老細介紹的，現在已經係那公司的CFO。他的老婆也是留學認識的，現在有兩個小朋友，家住自購四房單位。

我常常思考，如果當時選擇另一條路，跟隨爸爸的意見學返一技之長，他現在的人生會是怎麼樣的？做咗老細又或者係一個技師？依家比佢重新揀過，佢會點揀呢？

至於我點睇呢，我會羨慕細佬走的那條路。

網上課程：Dinosaur Ecosystems．恐龍的生態系統

(最後我們一起成功完成課程，到香港大學拎到這海報）

網上課程：Dinosaur Ecosystems．恐龍的生態系統

今次一收到通知，第一時間通知個仔，問佢參唔參加？

佢一口答應參加，因為上次太高興拎到好靚既恐龍poster。

還記得去年，我們一起學習時，他還是需要我大量幫助及協助。

但今日開始上第一課，他已經自己開始學習，我正想給意見時，他已經第一時間教我如何做如何睇，我只好慢慢望著他專心地學習，已經無從插手了。

的確，成長是需要放手的。

今次，等佢叫我先會出手。

學習是什麼？

每個人一開始都是差不多的，後來變得不同，都是因為習慣。

小學四年級，是高小，是小學階段的倒數，你小學的生活回憶是什麼，很大程度是你這個時候做了些什麼，你將來是什麼樣，取決在這時候你養成了什麼習慣。

學習重要，但習慣養成更加重要；讀書需要，但經歷體驗更加需要。

故此，今年會在讀書以外的體驗大幅增加。

在新學年開始，已經加入了2個校隊，及1個全港校際比賽，全部有興趣要求參加的。

學習不只是讀書，參加有興趣的，取消不喜歡的。

表演，讓自己專注練習；

比賽，讓自己了解不足。

俾錢專家教定自己親自教好？

好耐沒有寫嘢，蒲一蒲頭先。

睇標題就知道我想寫究竟俾錢專家教定自己教好：

其實結論好簡單搵到專家梗係專家教好啦，但係搵極都搵唔到，又或果D專家要好遠，來來回回嘥晒D時間，到最後迫於無奈都係要自己出手。

就舉一個最簡單嘅例子，寫字核突醜樣，其實可以搵一個書法家或者硬筆寫字班，俾錢人地上一上堂，感覺好簡單自己又唔使勞氣，但到你行到門口見到出面貼出嚟D字都係不外如是（學完都係，咁不如返屋企瞓覺），或者求其貼一疊比賽冠軍得獎嘅獎狀（用機會率計幾十個小朋友總有一兩個得到冠軍，然後又知道好多豬肉獎），所謂嘅專家其實係用錢買一個安慰，搵個托兒所放低小朋友做一D你佢想做嘅嘢，叫做心安理得，做咗野。

原本想放手都係過唔到自己個關。

本來諗住叫個仔自己練字，比本簿佢自己做，做咗一段時間效果一定唔好，到最後自己坐係佢旁邊望住佢，一齊做一齊練，我又有新嘅體會。

只要你坐低，望住佢半個鐘一個鐘都好，就算你幾忙一個星期同佢練一次又好，每日五分鐘十分鐘也好，陪佢一齊做，對大家都會有得着，你一定會望到有乜問題，你一定會發現到有D嘢，發現到一D平時唔會留意到嘅。

咁當然，一個小朋友始終都係小朋友，千祈唔好將你嘅標準套用係佢身上，咁一定會唔開心同鬧交。如果你驚鬧交大家唔開心，只要你將自己嘅要求降到最低，每一次見到有進步，哪怕係一點點好少好少，比一啲鼓勵同稱讚，最後都會有成果。

一年後睇返，你會發現每次小小嘅進步，會變得十分明顯。

小三學習小結

之前寫開繼續寫埋，參考返之前小二學習小結格式⋯⋯

其實考完試，我無乜嘢想寫，應該係輕輕鬆鬆放暑假嘅時候，個仔最近已經唔玩扭計骰，反而玩Kahoot! 呢個我都唔識玩，然後又用Scratch jr coding整卡送俾我，同睇書，學校借既書唔計，因為中文閲讀計劃已經唔只214本，多到我都數唔到。係屋企，中文書睇緊衛斯理，英文書睇緊Mr Stink - David Walliams。我覺得D書好厚，帶出街已經冇以前咁方便。

今次又寫一寫考試成績，雖然我已經沒有參與了，只係事後睇返。

最好一直都依然係數學，三年級是乘數表的時期，但我想講其實我沒有叫個仔去背乘數表，後果係計乘除計得好慢，也沒有去做任何嘅操練，不想他數學太早跑得太快太遠。現在最重要係培養數學興趣同埋打好基礎，缺點只係太多不小心及不必要錯誤。

然後到英文，由細細個開始一直最擔心係英文，因為始終英語都唔會係生活上嘅第一語言，幼稚園同屋企都係用中文為主，需要花時間花心機額外學習，而且我特別重視，始終將來大部份學科都係用英文考試。成績與預期一般，只是我們應該要開始多重視Grammer，錯誤太多是會影響writing分數的。

最後到中文，一直都以為由細細個開始以中文為主，中文都應該不成問題，甚至可以輕易達到中上的成績，但成績都係與之前一樣，中文作文也是需透過支持達到要求。中文認字都唔係最大問題，反而係結構複雜容易出錯及寫唔出。

其實我很多也沒有理會，不應寫太多。有需要時，再出手吧！

但我同個仔講，要求他讀書讀慢一點，讀得太快只知道書中內容，好詞好句也浪費了。

人生也是一樣，有時候是需要慢慢細味的。

女老師叫我們問兒子設定計劃及目標，說真的，中英文科只剩餘writing需要額外嘅支持，其他也感覺良好，但其實一般男孩子，都是十分懶散寫字，需要突然「叮」一聲的，才有動力要求自己。

這一下「叮」，有時候是需要慢慢找尋的。

我反而希望幫助他這一下「叮」。