陪伴的重要：老婆同個仔，二揀一

～任何事情只要心裡不放棄，總有一天會以某一種方式實現的。～

 老婆想去睇戲，個仔唔想睇戲，老婆又想個仔陪佢睇戲，個仔又唔想去睇戲…..

青春期的小朋友特別麻煩

「個仔長大了，已經有自己思想，唔似以前容易改變。」

老婆想同仔去睇戲，問仔：我地一齊去睇戲，好唔好？

仔：果齣戲，我唔鐘意睇喎

十分鐘之後，仲傾緊想個仔一齊去睇

我問：傾咁耐嘅，唔洗問啦，直接要求咪得囉

老婆：大個仔，要尊重佢，咪問下。

結果越傾越激動，情緒起伏太大，一般都唔會有好結果…

其實，決定可以好簡單，直接尊重個仔決定，放低佢一個，我地自己去睇戲，但似乎老婆唔捨得..

到左人生決擇2選1：

揀幫老婆說服個仔一齊去睇戲

還是

揀幫個仔說服老婆，尊重個仔唔鐘意，下次再睇呢？

睇落去，說服老婆似乎容易啲，始終可以下次再睇，又或者一齊做其他嘢。但係去到佢地兩個都情緒激動嘅時候，其實兩個都唔揀幫，食花生容易一點，有啲嘢係叫吃力不討好。

但唔知點解，

我就係選擇了揀幫老婆。

我拉住個仔一邊，先叫佢冷靜下，唔知點解會諗住同佢講道理，雖然我知道講道理唔係最有效嘅方法解決。

我：仔，有啲嘢唔係睇鍾唔鍾意的，有時陪伴都係好重要……..跟住講咗好耐，應該都有10分鐘，我都忍唔住..

心諗「講道理真係冇乜用，尤其係情緒起伏果時」

講道理唔得，就用強硬手段，乜都唔俾佢做，坐一邊慢慢等佢冷靜發呆。

但相處是一面鏡子，你強硬時對方更強硬。

事實係「夾硬黎無着數，談判大忌」

不過先來個強硬，就可以突顯加強我之後既溫暖溫柔…

我攬住個仔，抱着他輕聲說：乖仔，幫幫手，唔該晒你。

感覺到佢心軟，即刻把握機會拉著他到房間換衫。

見到佢開始猶豫，我接著說：咁我哋行先，直接去戲院等。

結果，到咗戲院，我地要買戲飛前，我打電話俾仔問：「你去到邊度啊？」

仔「轉彎就到戲院門口」

我望住老婆，笑了一笑：我哋可以買飛啦（其實我都心慌，驚個仔唔黎）

之後果啲行街購物，也有仔仔陪伴，不過我會告訴陪伴多長時間，1小時，半天，還是其他，然後就會放佢走去做喜愛的事情。

希望佢了解陪伴的重要性。

尤其係一起做你不喜愛的事情。

-

隨想：

你的思想引導你的選擇，不同選擇導致不同的結果，每個結果影響著之後每個的你。

在每個弦圈裡，到底是你選擇了結果，還是結果選擇了你。

當結果不是最後的，而是一種狀態…

心理那個不放棄的狀態⋯⋯

～任何事情只要心裡不放棄，總有一天會以某一種方式實現的。～

良好性格及習慣嘅野要從小培養，有啲野你一次唔理、二次唔知、第三次仲係忽視，就會定形，將來你想改變，唔係唔得，但你要付出更大的努力及更長的時間…

唔好覺得小朋友做野唔順眼，講嘢唔順耳，就係佢問題，其實冰封三尺非一日之寒⋯⋯

考試後．做司儀

記低個仔幾件我覺得驚訝嘅小事

1. 考完試第二日，我起身一早見到個仔係度閲讀一本厚厚嘅英文書（我估考試都辛苦，每日見你考完返嚟就瞓一陣，估唔到考完試都仲有興趣睇書）
2. 主動舉手做司儀（平時見開怕怕醜醜，面對人群講嘢又細細聲咁，叫佢多做台上表演佢都未必理你，估唔到自己會主動舉手做司儀）
3. 講完好野寫下壞野先，啲字仲係咁樣衰尤其是係英文字，要諗下辦法先得。

算啦都係唔好講咁多衰嘢，其實佢都努力進步中，希望佢越早越好啦。

寫住咁多先最近好忙。

生活習慣及情緒管理

同個仔做左咁多習慣及情緒管理，突然間好似有收成：

1. 8:45pm 自動走入去洗手間刷牙（要求九點半瞓覺，之前成日拖到夠鐘先入去刷牙，仲要不停的叫喚），然後九點鐘入房間瞓覺（早起早睡）
2. 假期起身第一時間飲水睇書（只要求飲水)
3. 假期出街食飯搭車時間都係睇書（要求得閒嘅空隙時間睇書）
4. 非打機時間，就算我攞機出嚟打，佢都唔會打（讀書時讀書 遊戲時遊戲）
5. 主動關心我，仲會幫下手添（關心別人）
6. 感覺上有禮貌左，識自動講唔該多謝（有禮貌）
7. 枱面乾淨整齊左，識自動執拾（乾淨整齊）
8. 情緒比較穩定左，唔會無啦啦發脾氣（不要輕易動怒）
9. 唔會隨便指責別人，明明人哋唔啱（不要輕易指責別人）
10. 當然仲有係自己做晒功課執好書包啦（自己嘅責任自己管理）

其實都差唔多，暫時睇到只差兩樣嘢，我會繼續影響個仔：

「一種努力堅持，永不輕易放棄嘅態度」

「還要保護自己，懂得適當嘅時候說不」

成績表．成績以外

今天在老師手上接過兒子的成績單，成績大幅進步，在我們家中特設的禮物績分表中，由上學期160，上升到320。

老婆馬上充滿期望地跟個仔講「我最希望你可以得到學科獎」。沒錯，可以得到學科獎固然是錦上添花，但人生不是短跑比賽，反而是一個耐力賽。

我對孩子說「我最希望不是你可否得到奬項，反而是看到你每次的進步，不斷的成長。我最開心不是你每次一百分，反而是慢慢由低分進步到高分的努力與過程。」

希望你繼續努力，加油！I am proud of you!

回家後，我們也主要分享了他可以在非學術上可以改善的地方，如先行動後思考，不要怕做錯而想太多，衝忙時也需要特別注意禮貌，禮多人不怪等…。

希望他不要忘記成績不是所有，

好品格，好習慣，好態度才是成就人生最重要嘅嘢。
--
今日7月7號，老婆攞咗兩張原諒他77次的戲飛，睇周柏豪同阿Sa ，本來放低個小朋友兩公婆去睇戲拍拖其實都好開心，可惜套戲咁令人傷感，雖然係咁，我覺得齣戲好好睇。同埋周柏豪好靚仔。

選擇：大學．理財

尋日聽家長分享同校長講野，都係講一樣野，俾自己嘅小朋友選擇喜歡嘅事情。

其中有個例子講到一個IB攞滿分嘅男仔，香港大學收咗佢，講明佢鍾意讀邊科就可以讀邊科，讀左一年後，個男仔發覺唔夠佢發揮，最後去咗劍橋讀。

其實講得無錯有得揀梗係好啦，首先要有條件揀啦，但最後都要識得選擇。

「雪糕與玩具」

今日同同事傾計，佢話佢個仔唔識理財，我就分享左二個故事：

第一個：

有一次到咗麥當勞門口見到軟雪糕賣緊$4，某啲原因決定俾$4個仔，請佢食雪糕，佢話俾我聽同一個區有兩間麥當勞，有一間賣緊$3.5，佢希望可以去另一間麥當勞買，找返黎既5毫子可以俾左佢，我答「okay, why not」

同事問我「到底點解佢會有咁嘅mindset嘅呢⋯⋯」

然後我又分享第二個故事：

又有一次因為某啲原因，我需要送一份小禮物俾個仔，於是我哋去玩具店一齊揀，我話俾個仔聽，小禮物嘅定義係$30以下，然後叫佢開始揀，佢第一時間好快咁揀咗份近門口$30嘅禮物，望住我。我答「都唔錯喎，請您記住呢份禮物先，我哋行一個圈出嚟就買咗它，喺途中請您留意每一份$30以下嘅禮物，我哋睇吓有冇更加好嘅選擇」

到最後唔使我多講，我個仔冇揀第一份佢話要嘅禮物，我哋一齊行嘅旅途之中搵到一份更好嘅禮物，價錢只有$20。

到最後個仔問我「爸爸仲剩返$10可唔可以買多一份$10嘅禮物」

我答「今次我哋來嘅目的係揀一份禮物，你今次剩返$10會留喺下一次用，如果再有機會，下次我哋一齊揀份$40以下嘅禮物」

一件事情教導兩個道理：

教佢去選擇：一件禮物嘅價值≠自己喜歡嘅程度，並唔係越貴自己會鍾意。

教佢去理財：當錢儲起下次先用，就可以有更多選擇。

小塘大魚定大塘小魚．思考方式軟實力

今日同個朋友研究一個話題，做「小塘大魚」好定或做「大塘小魚」好。

其實好多文章都有硏究或引述專家既分析，我見都係做小塘大魚好，而我自己都偏向覺得做小塘大魚開心點，特別是係讀書時期，因為我都感受過。

然後我想開口讚小塘大魚嘅時候，朋友就講咗一句「中國人有句說話：寧做名校地底泥都不做野校尖子」，然後佢繼續講「我就一向都係野校成績差果啲」，未繼續時等我先說說朋友而家背景，他是一個技術型嘅專業人士，已經晉升為跨國公司區域性嘅管理人員，之前還有用自己嘅專業教夜校，仲問我去唔去教。

佢話佢在學習時期代表小塘小魚，而我也細個時也住在小塘，但同一時間我們在工作上也轉換了大塘。

我笑佢「其實你當時用少少努力已經可以由小塘嘅一邊游到另外一邊，好容易就撞塘邊」，然後佢回我「你有冇諗過個池塘唔係一定四邊形而係圓形，可以沿着池塘邊不停咁游，一啲都冇影響」

「學習從來都係自己嘅事」

住喺大塘定小塘，其實對自己嘅影響分別不大，只要係自己喜歡學習，一定可以沿着池塘邊不停咁游，一啲都冇影響，反而最大個影響係來自非學習嘅事情上如：朋輩影響、社交網絡等

《經濟學人》（The Economist）公佈最新的全球裙帶資本主義指數（Crony Capitalism Index）評比結果

 

裙帶資本主義指數，是《經濟學人》統計各國億萬富豪在依賴與政府相關密切行業中，所獲取財富佔國內生產總值的比例，計算出各國的親信資本主義指數。簡單來說，就是衡量商業上的成功，是否取決於企業、商界和政府之間的關係密切程度，也就是你認識誰、跟誰有特別的關係，才是能不能賺到錢的主要關鍵。

問題係在學習時期過渡到工作時期後，到底是小塘或大塘出來對將來的影響比較大？其實小塘出身的我們，了解到自己的舊朋友舊同學們長大後的職業生涯後，我們紛紛以行動決定小塘或大塘好，已經不再辯論了。

「思考方式最重要」

講埋啲裙帶關係，其實好唔啱我，我個人比較我行我素，與其睇埋啲外在環境因素不如睇下自己本身可以做到啲乜。

其實你身在何方並不是最重要，我覺得在事業的選擇上，父母起了一個關鍵的影響，我自己的父母是打工後創業，他們送給我一份思考上特別的禮物，在任何事上做好後，然後作出懷疑及改變。容易嘅嘢唔使搵你做，做啲難嘅嘢先顯得自己嘅價值及能力。

硬生生的知識可以學，軟實力更反映個人質素及處事能力，影響一生。

閱讀速度計算．親子溝通．愚人節食鬼

宜家每個禮拜六，個仔學校科外活動，我就圖書館睇書，睇了2本書。
只覺得風景優美，睇書都開心啲，電腦都唔想開。

--
然後去聽演講，最深印象係鄭子誠和同理心。
本來講親子溝通，但用係夫妻關係都係相同，
其實作為男人，有時別人找你傾訴，第一時間也是在想解決問題。
現實上，道理是重要，聆聽問題和處理情緒在女人和小朋友上是更重要。
認同重覆佢地既不開心情緒已經是幫助了他們，這是男性最難明白的一環。

又令我想起Men Are from Mars, Women Are from Venus這本書
--
沈日招呼個德國人後，又燃起我對學英文的興趣，於是繼續我edX淸華大學學英文，
其中介紹一個網站How Long To Read：http://www.howlongtoreadthis.com/
可以幫你了解自己睇書個速度，於是我同個仔都測試了，我的不說了，個仔的288WPM：

Harry Potter and the Cursed Child, Parts 1 & 2, Special Rehearsal Edition Script

這本書會用大約6小時🤔
--
今天愚人節，當然要打機，google map打機，正：

輸左咪再黎過．安慰輕撫個仔

今天，唔記錄個仔日記，我們看完美女與野獸，

飲完茶就回家做功課，就是他兩天過去也沒時間做功課。

正如套戲話

#凡事唔好只睇表面

#係你既始終都係你

今天，又令我諗起2年前小學面試，

「最近有冇參加比賽呀？」副校長問個仔。

「有呀，參加了xx比賽呀，可惜輸了。」個仔答。

「咁咪好唔開心囉？」續問道。

「有少少失望啦，但唔緊要，輸左咪再黎過。」個仔答。

突然，我覺得個仔長大了。

今天，個仔情緒十分唔穩定，有時突然在哭，我們也莫名其妙，我通常也會逗他笑，說說笑話，多數也可破涕為笑，說說笑話行不通時，也可說說安慰說話，說說道理，但總有失效嘅時候。

小朋友發脾氣，有時很簡單，就是疲倦眼訓時，我換了換一個方法，將孩子拉到自己身邊，用手輕撫他的頭髮他的臉龐，發覺這個方法效果奇佳。

有時，安慰別人的心不是說話，凡事盡在不言中。

#點解佢會唔開心

#一個七歲小朋友

#輸左咪再黎過

#777