IB真係咁忙？定係我諗多咗？
本來想寫篇《如何不努力地讀好書》，點知個仔忙到連傾偈時間都冇，資料搜集直接泡湯。
既然係咁，不如轉個題，探討一個我好奇咗好耐嘅問題：
「IB真係咁忙？」又或者叫做「深度偷懶術」🤭
成日聽人講「IB讀到冇命」、「IB冇人生」，但喺我眼前嘅故事，似乎有啲唔同。
但這篇的確是一篇乞人憎的文章，炫耀令人討厭…但我又要記錄喎，下次還是寫別的好，或者正正經經寫好如何不努力地讀好書⋯⋯
---
《數學考試前嘅神奇一幕》
食完晚飯，個仔突然進入「溫書模式」，坐喺枱前奮筆疾書。
冇幾耐：
仔：「唉，唔識。」
再過一陣：
仔：「又唔識，直接睇答案算！」
我忍唔住行過去八卦：
我：「做咩突然咁積極？」
仔：「後日考試。」
我：「聽日放假喎，聽日先溫啦！」
仔：「聽日約咗人踢波。」
我：「咁你咪得半日溫書？夠唔夠㗎？仲要成日話唔識？」
仔：「應該冇問題。」
我：「不如改期踢波啦。」
仔：「校隊要練習嘛！」（冇錯，今年佢由籃球校隊轉咗去足球校隊）
我：「好啦好啦，你自己安排啦。」
其他活動同舊年一樣：捉棋、玩音樂、打籃球，
還有今年的睇商業書、準備SAT、去gym、踢波……
我終於忍唔住問：
「你讀咗三個月IB，同之前IGCSE有咩分別？」
仔：「我都唔覺有咩分別。」
我：「老師教法唔同咗？」
仔：「差唔多啦。」
我：「個個都話IB好忙，你覺得係咪？」
仔：「未覺得喎，可能下年後半年會忙啲，因為要申請大學。」
我差啲噴飯。
原來傳說中嘅「IB地獄模式」，喺佢眼中只係「普通模式＋踢波優先」？
---
乜咁樣讀書，都拎到高分？
《不是努力，只係運氣？》
如果我當年攞10A，實會周圍同人講「我點樣通宵溫書」、「我點樣捱更抵夜」。
但原來唔係個個都係咁諗。
近排我工作上成日聽到一句說話：
「我努力咗，問心無愧。」
聽落好謙虛，但諗深一層又有啲怪：
你嘅努力，難道只係為咗問心無愧？
真係冇期望過回報？定係期望落空，所以用「問心無愧」嚟安慰自己？
諗下諗下期間，一個更離譜嘅故事正在上演。
～獎學金：原來佢覺得只係「運氣」～
個仔嘅獎學金越攞越多，爺爺嫲嫲終於忍唔住出聲：
「話時話，你唔好諗住獨吞個孫啲獎學金喎，啲錢係佢自己賺返嚟㗎！」
其實啲錢都係用晒喺佢身上，只係我哋從來冇問過佢想點用。
但我覺得有啲道理，決定同仔認真傾一次：
我：「仔，我哋傾過啦，你啲獎學金係你努力嘅成果，係獎勵你嘅，應該由你話事。我哋想聽吓你意見。」
仔（一頭霧水）：「我唔覺得係努力嘅成果喎。」
我：「😮 咁唔係努力就係運氣啦？」
仔：「係啊，就係運氣。」
我：「哇，運氣獎學金！咁你想點用？投資？買PS5？定係請我哋食飯？」
仔（認真諗咗三秒）：「想要啲咩🤔……唔知喎。既然係運氣，就唔使特別獎勵啦。」
我當場呆咗。
我辛苦咗半世人，先明白「努力等於回報」嘅道理；
我個仔16歲，就已經睇透「運氣論」。
---
所以IB忙唔忙？
對個仔嚟講，忙嘅係踢波、校隊比賽、同朋友社交；
讀書、考試、獎學金，只係「運氣好咁就發生咗」。
我突然明咗：
我成日覺得「要努力先有回報」，
但有啲人天生就活喺 習慣性的「輕鬆模式」。
所以，
IB真係咁忙？
可能係忙嘅，
但係到底努力重要定運氣重要？
仔所指的運氣真是運氣嗎？🤔
還是他的習慣？
你最終成為什麼樣的人，不由你的‘想法’決定，而是由你‘反覆做’的事情決定？
想着想着，我突然看到個仔拎着一本書來看：
《深度工作力》分心時代的超能力
Deep Work: Rules for focused success in a distracted world
我望著他專注讀《深度工作力》的側影，突然明白了——
所謂的「運氣」，可能只是習慣的累積；
所謂的「輕鬆」，可能是懂得何時專注、何時放鬆的智慧。
他早已在踢波與溫書之間，練就了屬於自己的節奏。
IB忙不忙已不再重要，重要的是，他學會了如何在分心的時代，活出自己的深度。
所以又寫多一次，
除了他覺得的運氣，也希望他可以找到他專屬的幸運。
～讓自己變幸運的四種方式：一是期盼好運找到你；二是到處奔走，直到遇到好運；三是鍛鍊心智，看到別人看不到的機會；四是成為自己領域的佼佼者，機會自然會找到你，於是幸運成為你的命運。～
沒有留言:
發佈留言