再續教育改變人生：一技之長

昨天與一個舊同事吃飯，他中五畢業後因為成績嘅問題不再升學，他吸引我嘅注意的不是他很勤力和熱心幫助同事，而是他十分專心鑽研自己嘅興趣。

畢業後他找到自己當時的興趣：日文。在工餘時間，他不斷進修，最後考到最高級別嘅一級（日文考試分為１級、２級、３級、４級和５級五個級別。１級為最高程度。）

當時的他，順理成章地轉到一間日本公司工作，人工三級跳，也找到一個可愛的老婆，結婚後也有兩個可愛的小朋友，人生似乎係一帆風順事事順利。

可惜日本文化熱潮嘅退卻，韓國文化嘅興起，他工作的日本公司不斷裁員，最後他也失業了。雖然他最後也找到另一間日本公司工作，但人工大幅下跌，生活迫人，最後因為可以多兩千蚊人工轉去另一間港資公司工作，正式地跟他常引以為傲的日文畫上句號。

為咗小朋友既生活，他還繼續奮鬥培養另一種專長，在星期日放假時兼職幫人驗新樓，他很高興說已經完了15個新樓嘅單位，希望可以累積100個單位嘅經驗，自己又可以成為一個有經驗嘅師傅，或者有機會成立公司繼續這份專業。

講到底，其實呢啲門檻咁低係人都做到嘅一技之長，希望佢可以明白，如果佢冇能力加以改進，精益求精，佢將來嘅生活可以預計到繼續迫人。

希望佢嘅勤力與態度可以令佢好運。

教育改變人生

一個小故事，教育改變人生：

我家，有我和我細佬2兄弟，我雖然小時懶散，大時卻讀書比較勤力，公開試都唔低份，可順利入讀香港嘅大學。而我嘅細佬跟我剛剛相反，雖然有點小聰明，小時不錯，但大時卻比較懶散，愛打機同玩樂，咁當然考公開試就失敗左。

那時屋企有兩個不同嘅聲音及意見：爸爸覺得讀書不太重要，反對細佬繼續讀書，應該學返一技之長傍身，讀唔到書就唔好浪費時間，早啲出嚟社會做嘢；至於媽媽十分贊成繼續讀上去，但係沒有意見如何繼續升學。

最後細佬為咗可以繼續讀書，搵咗好多不同嘅資料，最後決定到外國升學。

咁結果係乜呢：第一份工，因為外國升學嘅緣故，有個外籍老細請了他，因為容易了解，同聲同氣。第二份工就係第一份工老細介紹的，現在已經係那公司的CFO。他的老婆也是留學認識的，現在有兩個小朋友，家住自購四房單位。

我常常思考，如果當時選擇另一條路，跟隨爸爸的意見學返一技之長，他現在的人生會是怎麼樣的？做咗老細又或者係一個技師？依家比佢重新揀過，佢會點揀呢？

至於我點睇呢，我會羨慕細佬走的那條路。

網上課程：Dinosaur Ecosystems．恐龍的生態系統

(最後我們一起成功完成課程，到香港大學拎到這海報）

網上課程：Dinosaur Ecosystems．恐龍的生態系統

今次一收到通知，第一時間通知個仔，問佢參唔參加？

佢一口答應參加，因為上次太高興拎到好靚既恐龍poster。

還記得去年，我們一起學習時，他還是需要我大量幫助及協助。

但今日開始上第一課，他已經自己開始學習，我正想給意見時，他已經第一時間教我如何做如何睇，我只好慢慢望著他專心地學習，已經無從插手了。

的確，成長是需要放手的。

今次，等佢叫我先會出手。

學習是什麼？

每個人一開始都是差不多的，後來變得不同，都是因為習慣。

小學四年級，是高小，是小學階段的倒數，你小學的生活回憶是什麼，很大程度是你這個時候做了些什麼，你將來是什麼樣，取決在這時候你養成了什麼習慣。

學習重要，但習慣養成更加重要；讀書需要，但經歷體驗更加需要。

故此，今年會在讀書以外的體驗大幅增加。

在新學年開始，已經加入了2個校隊，及1個全港校際比賽，全部有興趣要求參加的。

學習不只是讀書，參加有興趣的，取消不喜歡的。

表演，讓自己專注練習；

比賽，讓自己了解不足。

俾錢專家教定自己親自教好？

好耐沒有寫嘢，蒲一蒲頭先。

睇標題就知道我想寫究竟俾錢專家教定自己教好：

其實結論好簡單搵到專家梗係專家教好啦，但係搵極都搵唔到，又或果D專家要好遠，來來回回嘥晒D時間，到最後迫於無奈都係要自己出手。

就舉一個最簡單嘅例子，寫字核突醜樣，其實可以搵一個書法家或者硬筆寫字班，俾錢人地上一上堂，感覺好簡單自己又唔使勞氣，但到你行到門口見到出面貼出嚟D字都係不外如是（學完都係，咁不如返屋企瞓覺），或者求其貼一疊比賽冠軍得獎嘅獎狀（用機會率計幾十個小朋友總有一兩個得到冠軍，然後又知道好多豬肉獎），所謂嘅專家其實係用錢買一個安慰，搵個托兒所放低小朋友做一D你佢想做嘅嘢，叫做心安理得，做咗野。

原本想放手都係過唔到自己個關。

本來諗住叫個仔自己練字，比本簿佢自己做，做咗一段時間效果一定唔好，到最後自己坐係佢旁邊望住佢，一齊做一齊練，我又有新嘅體會。

只要你坐低，望住佢半個鐘一個鐘都好，就算你幾忙一個星期同佢練一次又好，每日五分鐘十分鐘也好，陪佢一齊做，對大家都會有得着，你一定會望到有乜問題，你一定會發現到有D嘢，發現到一D平時唔會留意到嘅。

咁當然，一個小朋友始終都係小朋友，千祈唔好將你嘅標準套用係佢身上，咁一定會唔開心同鬧交。如果你驚鬧交大家唔開心，只要你將自己嘅要求降到最低，每一次見到有進步，哪怕係一點點好少好少，比一啲鼓勵同稱讚，最後都會有成果。

一年後睇返，你會發現每次小小嘅進步，會變得十分明顯。

小三學習小結

之前寫開繼續寫埋，參考返之前小二學習小結格式⋯⋯

其實考完試，我無乜嘢想寫，應該係輕輕鬆鬆放暑假嘅時候，個仔最近已經唔玩扭計骰，反而玩Kahoot! 呢個我都唔識玩，然後又用Scratch jr coding整卡送俾我，同睇書，學校借既書唔計，因為中文閲讀計劃已經唔只214本，多到我都數唔到。係屋企，中文書睇緊衛斯理，英文書睇緊Mr Stink - David Walliams。我覺得D書好厚，帶出街已經冇以前咁方便。

今次又寫一寫考試成績，雖然我已經沒有參與了，只係事後睇返。

最好一直都依然係數學，三年級是乘數表的時期，但我想講其實我沒有叫個仔去背乘數表，後果係計乘除計得好慢，也沒有去做任何嘅操練，不想他數學太早跑得太快太遠。現在最重要係培養數學興趣同埋打好基礎，缺點只係太多不小心及不必要錯誤。

然後到英文，由細細個開始一直最擔心係英文，因為始終英語都唔會係生活上嘅第一語言，幼稚園同屋企都係用中文為主，需要花時間花心機額外學習，而且我特別重視，始終將來大部份學科都係用英文考試。成績與預期一般，只是我們應該要開始多重視Grammer，錯誤太多是會影響writing分數的。

最後到中文，一直都以為由細細個開始以中文為主，中文都應該不成問題，甚至可以輕易達到中上的成績，但成績都係與之前一樣，中文作文也是需透過支持達到要求。中文認字都唔係最大問題，反而係結構複雜容易出錯及寫唔出。

其實我很多也沒有理會，不應寫太多。有需要時，再出手吧！

但我同個仔講，要求他讀書讀慢一點，讀得太快只知道書中內容，好詞好句也浪費了。

人生也是一樣，有時候是需要慢慢細味的。

女老師叫我們問兒子設定計劃及目標，說真的，中英文科只剩餘writing需要額外嘅支持，其他也感覺良好，但其實一般男孩子，都是十分懶散寫字，需要突然「叮」一聲的，才有動力要求自己。

這一下「叮」，有時候是需要慢慢找尋的。

我反而希望幫助他這一下「叮」。

考試後．做司儀

記低個仔幾件我覺得驚訝嘅小事

1. 考完試第二日，我起身一早見到個仔係度閲讀一本厚厚嘅英文書（我估考試都辛苦，每日見你考完返嚟就瞓一陣，估唔到考完試都仲有興趣睇書）
2. 主動舉手做司儀（平時見開怕怕醜醜，面對人群講嘢又細細聲咁，叫佢多做台上表演佢都未必理你，估唔到自己會主動舉手做司儀）
3. 講完好野寫下壞野先，啲字仲係咁樣衰尤其是係英文字，要諗下辦法先得。

算啦都係唔好講咁多衰嘢，其實佢都努力進步中，希望佢越早越好啦。

寫住咁多先最近好忙。

生活習慣及情緒管理

同個仔做左咁多習慣及情緒管理，突然間好似有收成：

1. 8:45pm 自動走入去洗手間刷牙（要求九點半瞓覺，之前成日拖到夠鐘先入去刷牙，仲要不停的叫喚），然後九點鐘入房間瞓覺（早起早睡）
2. 假期起身第一時間飲水睇書（只要求飲水)
3. 假期出街食飯搭車時間都係睇書（要求得閒嘅空隙時間睇書）
4. 非打機時間，就算我攞機出嚟打，佢都唔會打（讀書時讀書 遊戲時遊戲）
5. 主動關心我，仲會幫下手添（關心別人）
6. 感覺上有禮貌左，識自動講唔該多謝（有禮貌）
7. 枱面乾淨整齊左，識自動執拾（乾淨整齊）
8. 情緒比較穩定左，唔會無啦啦發脾氣（不要輕易動怒）
9. 唔會隨便指責別人，明明人哋唔啱（不要輕易指責別人）
10. 當然仲有係自己做晒功課執好書包啦（自己嘅責任自己管理）

其實都差唔多，暫時睇到只差兩樣嘢，我會繼續影響個仔：

「一種努力堅持，永不輕易放棄嘅態度」

「還要保護自己，懂得適當嘅時候說不」

輸贏唔重要，最緊要好玩

「輸贏唔係最重要，最緊要係好玩。」呢句野我領悟咗好耐，好想咁諗，但係成日都做唔到，估唔到係自己個仔口中聽到。

記得幾年前佢講「輸咗咪再黎過囉」，我已經覺得好犀利，講就易囉，咁易做到咩。

直至到，呢幾日放假同佢打機，打一個計時嘅防塔遊戲，中間一個主塔，兩邊各一個副塔。我見佢個一個副塔快將淪陷時，就好緊張咁同佢講「快啲守住個塔，就嚟失手啦」，但佢不只沒有防守個副塔，反而好輕鬆咁講「時間差唔多啦」，我見時間剩返20多秒，一邊副塔已經失守，我心諗一定輸啦。

當個仔嘅主塔受到猛烈攻擊嘅時候，佢只放了一小部份兵力防守，而同時進攻對手兩邊副塔，在對手忙於進攻佢嘅主塔時，眼見勝利在望，估唔到對手嘅兩個副塔在最後幾秒嘅時間同時淪陷，遊戲結束，個仔得到最後勝利。

個仔同我講「個遊戲最重要嘅就係時間，計啱時間做出決定就會勝利」

個仔嘅說話，我感到很震撼。

呢件事情令我學到多嘢，最重要嘅係，唔好睇低小朋友嘅智慧。

仔仔，我好佩服你。

被動的藝術：我可以放手嗎？

延續上一篇所寫，既然你攞咗被動權就千祈唔好咁容易攞返主動權。

風箏要飛得高，首先你要懂得收和放。

究竟主動權同被動權對小朋友有咩影響？

「主動權」：

當你手執主動權，追佢做功課啦、執書包啦、唔食早餐啦、刷牙啦、沖涼啦、溫書啦、所有呢啲生活上嘅細節⋯

睇落呢啲全部都係好小事，其實每一件嘅大事發生就係有無數嘅小事伸延出嚟，到個小朋友長大成人嘅時候，你諗下佢會變成係一個乜嘢嘅人？

當你由細到大都習慣等人落命令叫你做嘢，你做既所有嘢及每一件事都會在等待。做每一件小事都喺度等緊人追你，做每一件大事都喺度等待指令，係一件幾令人擔心嘅一件事。

大個咗讀乜嘢科目、揀邊間學校都要等你指令，搵工又等你追佢、結婚又等你追佢、就黎去唔去廁所都問吓你，乜都關你事，真係聽起來都覺得匪夷所思。

但事實上習慣成自然，好多野都係每一日嘅生活習慣形成。

你每日做緊啲乜其實就可以預測到你將來會係啲乜嘢人。

「被動權」：

當你手執主動權嘅時候小朋友就會係被動，但當你手執被動權嘅時候，小朋友就需要做返主動，唔係佢哋就會不停咁發現唔同既問題。

你唔再提醒小朋友執書包，佢一返學就會發現執少咗書、執少咗功課，冇得用冇得交自然會俾人問。

你唔主動幫佢簽手冊，佢會發現返到學校冇人同佢簽手冊又俾人問，最後佢都要追你簽手冊佢先可以瞓覺。

你唔好追佢快啲，佢就會遲到，如果每日都係你遲到，俾人問得多就會自己快啲。

如果你收晒所有主動權，個小朋友都係懶洋洋，其中一個最大嘅問題，就係佢唔夠痛。

你比針吉到，你會縮手，因為你會痛。

你俾人打，你會避開，因為你怕痛。

你唔作出反應，最大嘅原因係你唔夠痛，個心覺得一啲問題都冇，個腦自然會唔有反應。

你身邊所有人都係咁，你睇慣左，你自然都係咁。

你身邊所有人都冇要求，你自然都會冇乜要求。

所以你要放手嘅時候，你要睇清楚情況先好放手，一樣一樣咁做，循序漸進。

加速需要時間，減速亦都需要時間。

識得放手，識得減速，先會成為高手。

每日講幾十遍叫小朋友早點睡覺有用嗎？

個仔越大越唔想早啲訓，依個現象好容易明白，大人都唔想瞓，更何況小朋友呢。

怪就怪，呢個世界誘惑太多，時間太少。

都未眼瞓，又未夠鐘，仲有好多野未做，玩多陣先算啦，好想睇電視，仲未執書包，又未做曬功課，總之有十萬個理由可以令你遲啲瞓覺。

就算以上嘅理由都成立，當你叫個小朋友叫極都唔起身嘅時候，又或者朝頭早起身嘅時候，又賴床又話眼瞓，就證明根本就唔夠瞓。

睡眠不足對大人來講當然有影響啦，但對小朋友影響更大，所以每一日都好似打仗咁，係咁叫早點瞓覺，喊打喊鬧，又話懲罰這，又話懲罰那。

你唔厭我都煩。

我決定俾你揀，你自己揀你自己選擇，你可以選擇今日晏啲瞓，但係聽日就會早啲瞓。

正常情況下，個仔每日都係九點半一定要上床訓，總之如果遲過九點半瞓覺，明天就會九點鐘瞓覺，之後每15分鐘為單位，今天遲咗訓就自動明天早15分鐘瞓覺。

以後叫你瞓覺嘅責任就唔係我地父母身上，小朋友自己話事自己負責。

當佢選擇今天享受遲瞓覺嘅樂趣，明天就會自動享受早睡覺嘅影響。

今日嘅選擇，明天嘅結果。

後記：個仔問我可唔可以每日九點鐘訓，每日儲蓄半個鐘頭，咁有一日就可以好遲都唔使瞓啦。😑

仲有一個好重要嘅細節：每次都唔好追佢，要叫佢慢慢來，你追佢就變咗你急，你明明做被動千祈唔好做返主動。

一個思考快的小朋友

家長日後，見到個仔主要做得比較好嘅：

1. 聆聽
2. 閱讀
3. 口語

呢幾樣，係我覺得好重要嘅能力，我本以為個仔進步左啦，然後再睇返一年班的成績表，發現呢幾樣同樣都係做得比較好嘅。

分別就係嗰陣時只係中文做得好，現在中英文同時做得一樣咁好。

「做得好的地方依然係做得好，而做得唔好嘅地方依然都係做得唔好。」

當然錦上容易添花，但雪上也容易加霜。

做得唔好嘅地方，只係想知道點解，睇吓相應嘅對策。

尤其是係寫字上，字醜的問題依然存在。其實個仔中文寫得唔太差，可是英文寫得特別地差，同一時間有時好靚有時好差，一直都唔係好明點解，直至老師話俾聽⋯

「佢係諗嘢快過佢隻手寫嘅速度」

佢隻手寫字嘅速度追唔到佢諗嘢嘅速度，為咗令到自己仲記得之前寫好晒，所以快快手寫，咁啲字就會好潦草。

所以，如果有時間或者唔使諗嘅功課就可以寫得靚。

我終於明白原因：

「個仔係一個思考快嘅小朋友」

又係小老師時間．fun to learn

今次係今年第一次fun to learn，不過唔係我個仔fun to learn，反而係我去感受一下。

呢一次都係個仔教我野，但開始時，他說「跟我玩個遊戲：hangman猜單字遊戲」

然後就拿出一張紙後寫上「_ _ _ _ _ _ _ 」

3個vowels.  十分難估.

原來個字係igneous - 火成岩，是指岩漿或熔岩冷卻和凝固後，成形的一種岩石。火成岩是三種主要岩石類型之一，其他兩種類型分別是沉積岩和變質岩。

然後陸陸續續就係估石頭單詞的遊戲，對我來說十分困難。當你估極都估唔到嘅時候就會好想放棄，同會覺得一啲都唔覺得好玩。

呢個時候唯有轉移視線，因為我已經唔想玩落去，但佢又好投入咁同我玩，於是我就請教個仔啦，果三種石頭其實點分，呢個時候佢就搵咗一個YouTube片嚟講解，原來igne係拉丁文嚟嘅，意思即係「火」咁解。

今次fun to learn我明白左一樣野：

教授一啲好困難嘅嘢，我會冇心機之餘又會好快唔記得。你同我不斷咁玩遊戲，玩啲我唔明嘅嘢，我又一樣會冇心機，玩係一個過程去吸引你，但最重要係解釋，由最基本嘅嘢開始解釋，咁先會最容易記得同明白。