記錄回憶．面試心得．不要相信一切有下次

 

陪個仔寫下週記，努力堅持着這好習慣. 

睇返之前寫的文章，聽返之前錄的聲帶，果啲回憶返晒黎，好好睇好好聽好好笑，與相片及影片的感覺很不同，是外在世界及內心世界的分別。

好習慣唔堅持，慢慢地便會失去～然後幾年後醒覺時，發現有些時間記錄沒辦法追回。

~陪伴了，但記憶卻被沖淡了～

睇返啲錄音，第一段係2015年開始，影片太大，不容易儲存找尋，反而所有錄音及文字可以一直保留在手機裏，方便找尋及分享，所以有價值的影片，我會轉做聲音保存一次。

老婆說有同事最近第一次面試失敗了，好可惜。所以我們找回幾年前同個仔交流面試心得的聲帶，宜家聽返也會會心微笑，細細回味。

Talk：與仔交流小學面試心得.

聲帶長度：18分鐘29秒。

https://drive.google.com/file/d/149D0_hBb60NuFgZswvNzWzuvkA9ffax8/view?usp=drivesdk

之前是包括一些聲帶及文件分享給朋友的，現在應該過時了吧。

如果宜家叫個仔面試高中大學，唔知會點？有機會模擬下玩下先。

外國有一本雜誌曾做過一個訪問，訪問60歲以上的人 : 你最後悔的是什麼？

以下是統計前五項的結果，這些智慧老人的分享，相信值得我們好好反思。

第一名：92%的人後悔年輕時努力不夠導致一事無成

第二名：73%的人後悔在年輕的時候選錯了職業

第三名：62%的人後悔對子女教育不當

第四名：57%的人後悔沒有好好珍惜自己的伴侶

第五名：45%的人後悔沒有善待自己的身體

後悔是錯過了，是失去了～

沒有感覺，因為你仲未痛；

沒有行動，因為你仲未夠痛；

開始痛既時候，會唔會已經係太遲；

開始行動時候，會唔會代表錯過了、失去了～

錯失太易，行動太遲·

只差一秒，心聲都已變歷史．

～不要相信一切有下次～

IGCSE揀科．仔說你咁樣唔得啦

任何值得去的地方，都沒有捷徑～

你每走過的一步，都會帶領著你～

係IB考試之前，要先考IGCSE。

話咁快就到咗IGCSE揀科時間了，又明白多啲之前點解要讀咁多科，先了解後選擇。

科目：

中文

英語

數學

全球視角

化學

生物學

物理

商業研究

地理

歷史

經濟學

藝術設計

藝術紡織品

DT設計與技術

食品和營養

音樂

附加數學

體育

戲劇

ICT信息技術及通訊技術

電腦科學

英國文學

共22科

同個仔睇左22科個表，然後佢將共32頁PDF文件射上電視一齊睇，用Notability 開可用筆highlight 選擇。

我：咁多科揀10科，點揀好？

仔：首先螢光筆highlight想要果啲同必修科，黑筆刪除唔想要果啲。

我：咁剩返幾科又好似容易啲揀，咁之後揀你之前成績好果啲，咁咪搞掂🤣easy.

仔：你咁樣唔得啦，之前(大學展)Imperial咪講過要揀有passion既學生，你咁樣做決定，咪入唔到Imperial 囉。

（你咁樣唔得啦，終於俾仔教訓了。）

仔續：成績好，唔一定有passion，唔一定鐘意。相反，有passion最後一定會成績好。

「有passion最後一定會有好成績。」又好似係喎…又幾合理…

我：有passion如果最後成績都唔好咁點算。

仔：咁即係無passion，唔夠或錯覺黎的。

我：😮真係咁簡單🤔（你鐘意讀，放時間心機落去，就會好成績）

（似是而非嘅道理）

我沒放棄續：咁啦，我搵左啲舊年你成績有Ex出現過的科目（包括其中一部分），中文、英文、數學、綜合科學、ICT、歷史、DT 、地理、音樂、STEM等，其實戲劇你都唔錯，你睇下。

仔驚訝：乜我歷史有Ex出現過😮

我：其實你可能唔係咁了解自己，咁點follow your passion🤣

我又感覺唔到仔對passion既追求🤣。睇唔出又感覺唔到🤣

～～是我太膚淺，是我看不穿～～

但睇遠啲，似乎IGCSE係IB前奏，IB又係大學選科的影響。

遲啲再睇下先，但我鐘意個仔嘅答案：Passion. 

「追求你熱愛的」

續.

陪伴的重要：老婆同個仔，二揀一

～任何事情只要心裡不放棄，總有一天會以某一種方式實現的。～

 老婆想去睇戲，個仔唔想睇戲，老婆又想個仔陪佢睇戲，個仔又唔想去睇戲…..

青春期的小朋友特別麻煩

「個仔長大了，已經有自己思想，唔似以前容易改變。」

老婆想同仔去睇戲，問仔：我地一齊去睇戲，好唔好？

仔：果齣戲，我唔鐘意睇喎

十分鐘之後，仲傾緊想個仔一齊去睇

我問：傾咁耐嘅，唔洗問啦，直接要求咪得囉

老婆：大個仔，要尊重佢，咪問下。

結果越傾越激動，情緒起伏太大，一般都唔會有好結果…

其實，決定可以好簡單，直接尊重個仔決定，放低佢一個，我地自己去睇戲，但似乎老婆唔捨得..

到左人生決擇2選1：

揀幫老婆說服個仔一齊去睇戲

還是

揀幫個仔說服老婆，尊重個仔唔鐘意，下次再睇呢？

睇落去，說服老婆似乎容易啲，始終可以下次再睇，又或者一齊做其他嘢。但係去到佢地兩個都情緒激動嘅時候，其實兩個都唔揀幫，食花生容易一點，有啲嘢係叫吃力不討好。

但唔知點解，

我就係選擇了揀幫老婆。

我拉住個仔一邊，先叫佢冷靜下，唔知點解會諗住同佢講道理，雖然我知道講道理唔係最有效嘅方法解決。

我：仔，有啲嘢唔係睇鍾唔鍾意的，有時陪伴都係好重要……..跟住講咗好耐，應該都有10分鐘，我都忍唔住..

心諗「講道理真係冇乜用，尤其係情緒起伏果時」

講道理唔得，就用強硬手段，乜都唔俾佢做，坐一邊慢慢等佢冷靜發呆。

但相處是一面鏡子，你強硬時對方更強硬。

事實係「夾硬黎無着數，談判大忌」

不過先來個強硬，就可以突顯加強我之後既溫暖溫柔…

我攬住個仔，抱着他輕聲說：乖仔，幫幫手，唔該晒你。

感覺到佢心軟，即刻把握機會拉著他到房間換衫。

見到佢開始猶豫，我接著說：咁我哋行先，直接去戲院等。

結果，到咗戲院，我地要買戲飛前，我打電話俾仔問：「你去到邊度啊？」

仔「轉彎就到戲院門口」

我望住老婆，笑了一笑：我哋可以買飛啦（其實我都心慌，驚個仔唔黎）

之後果啲行街購物，也有仔仔陪伴，不過我會告訴陪伴多長時間，1小時，半天，還是其他，然後就會放佢走去做喜愛的事情。

希望佢了解陪伴的重要性。

尤其係一起做你不喜愛的事情。

-

隨想：

你的思想引導你的選擇，不同選擇導致不同的結果，每個結果影響著之後每個的你。

在每個弦圈裡，到底是你選擇了結果，還是結果選擇了你。

當結果不是最後的，而是一種狀態…

心理那個不放棄的狀態⋯⋯

～任何事情只要心裡不放棄，總有一天會以某一種方式實現的。～

良好性格及習慣嘅野要從小培養，有啲野你一次唔理、二次唔知、第三次仲係忽視，就會定形，將來你想改變，唔係唔得，但你要付出更大的努力及更長的時間…

唔好覺得小朋友做野唔順眼，講嘢唔順耳，就係佢問題，其實冰封三尺非一日之寒⋯⋯

老師好唔好？

迷思：曾經聽過人講，好的老師主要集中在小學及高中，初中既不是打好基礎時間，也不是面對公開考試，所以容易俾人忽視。

所以我又叫左個仔講下今年啲老師，等我可以了解多啲，個仔講左12分鐘30秒，17個老師，涵蓋18個科目，包括中文、英文、數學、中史、西史、科學、地理、戲劇、資訊科技、音樂、樂器、體育、生活教育、藝術、法文、烹飪、設計工藝、企業等。

我分了三類：

正面的：

好人，分組活動，好多不同活動及遊戲 - 幾有趣的。

喜歡講笑，唔會只講課內容，比較自由，隨心。但提醒行為後果影響成績

新老師，教書幾好，會教到上堂要學內容。

幾有趣，說話生動，教到我地，有笑話聽。

好人，喜歡鼓勵人嘅老師，好正面，可帶動上堂氣氛。

好有條理，細心，好有標準，一個好好嘅老師。

之前係學校學生，教得好好，好正面氣氛，好開心。

教到，指揮好，糾正錯處，練習出得好。

好，有point ，有道理。

中性的：

大聲，照顧唔識同學，教好每個同學為主，不會太好或太差。

教到上堂內容，OK。

負面的：

不生動，英文唔標準，沒有互動，罵人，上堂超時。

就咁聽落大致上都唔錯啊，佢講嘅果少部份負面野，我以前上堂嗰啲老師全部有晒，傳統教學就不嬲冇互動，仲有唔守紀律的人，俾人鬧就一定啦。英文唔標準係好正常，大學好多老師都係咁，唔同國家嘅老師就會遇到咁嘅問題，上堂超時，教唔晒咪要超時囉。

我們以前平常的事在他眼中已經是不正常。🤣

有一天，我聽另一個同學講，有個老師好好，好照顧每一個同學，同學唔明地方都會慢慢解答，但是我聽個仔講普通啦，果啲野佢識曬了，感受唔到老師的照顧。

果然，每個人對好壞也有不同的感受。

聽個仔分析：

個仔話老師好唔好，原來唔係最重要，我聽佢分析，同學好唔好，影響更加大。

如果可以選擇，他更加希望與優秀的同學同班。

當大人覺得老師最重要，原來小孩覺得一班優秀的同學在一起會比老師更加重要！

結論：

「同學比老師更重要」

咁，我又明白多啲。