續講中文．中文書推介：全家搶著睇！

 接續上一篇，寫下去。

仔說：「估計只拎到9A，因為中文拎不到。」

IGCSE 在8月19日放榜，到時睇下個仔估得啱唔啱。

不過考試都考完，成績已成定局，多想無用，還是專心向前看吧！

最近有朋友大力推薦《天之下》，話係「三弦」嘅神作，好睇到無敵，沒有之一！  

聽到咁誇張，我即刻將其他書丟一邊，拎起呢本書睇，結果真有驚喜！二話不說，馬上推介俾我個仔。

昨晚，老婆見時間唔早，催個仔：「夠鐘瞓覺啦！」  

點知個仔一臉投入，話：「太刺激啦！俾我再睇一陣先瞓啦！」  

結果呢個「一陣」，眨下眼就過咗差唔多一小時…

我忍唔住問：「邊度咁好睇啊？」  

個仔答：「第四章開始真係停唔下來！」  

我心諗：「我先睇到第二章，仲未感受到呢…」

今日一返到屋企，我同個仔講：「第四章真係好睇！」  

點知佢一臉得意：「我已經睇到第九章啦，啱啱返學途中喺車上都偷睇咗一陣！」  

我聽完只係「嘩」咗一聲，佩服佢嘅速度。

食飯時，我問個仔：「頭先放學早放你同同學踢波，點解唔食完飯先返？」  

佢答：「食完飯太夜，呢個星期瞓得少，已經攰到爆。」  

我點頭：「都係，之前考試溫書瞓得太多，而家返正常作息變咗要早起身，今晚早啲瞓啦！」

點知一食完飯，個仔又拎起書，睇到連瞓覺都唔捨得。  

等到佢終於瞓著，老婆偷偷問我：「個仔睇緊咩書呀？真有咁好睇，連瞓覺都唔捨得？」  

我答：「係《天之下》，真係幾好睇。」  

老婆眼仔碌碌：「真係咁正？偷偷send俾我睇吓，唔好俾個仔知呀！」

我心諗：連老婆都畀呢本書吸引到，究竟佢會唔會真係睇呢？  

到底《天之下》係咪真有咁神，令人咁著迷呢？

-

後記：

天之下有3百幾章，幾百萬字等於約慶余年，我跟仔說每天睇一章也需要一年時間，到底仔要睇幾耐呢？但可以確定的是我現在一早起身就見到仔在看書了。