與孩子對話．壞同學

呢度記錄一下我同個仔關於壞同學嘅對話

首先講下點解要同個仔講呢個話題，話說個仔約三至四歲嘅時候，有一日同佢去圖書館，我同佢每人攞咗本書，搵左個位坐低。睇咗一陣，有一個大約五歲嘅小朋友走過嚟，行過我哋睇書嘅地方，踩左我個仔隻腳一下，唔知有意定無意，我見佢望左我個仔一下，就行走咗，當時我個仔冇俾任何反應。本來件事應該就咁完左，點知，
個小朋友走返轉頭，踩多我個仔隻腳一下，我個仔望咗個小朋友一下，都係冇俾任何反應。然後個小朋友來來回回踩左多三下，我冇出手睇吓個仔有咩反應，點知佢都係默默忍受。個小朋友最後一下踩住唔放，然後我忍唔住，望實個小朋友，問佢'你做緊乜嘢'，當然個小朋友就好驚咁走咗去。呢件事之後我開始教導個仔乜嘢叫做－－欺凌－－同應對。

呢幾日，同個仔傾計傾到啲同學仔，當然update下了解多啲。

首先，我開始入正題，話爸爸讀書嗰陣時見過好多壞同學，不如我哋比較下睇下我果時見啲壞同學壞啲定你見啲壞同學壞啲，講吓講吓講咗好多，估唔到時代唔同，壞同學嘅行為都係一樣，打人啦、成日搞人騷擾人啦、搗亂啦、整爛人哋啲嘢、上堂瞓覺、偷嘢講大話…
其實我知道呢啲只係一啲小撮人嘅惡作劇。

不過佢話俾我聽，行為壞嘅同學≠成績唔好，有啲仲好聰明

然後我哋傾到解決方法，其中一樣我俾咗個提議佢，不如轉校囉。
之後嘅討論令我更加了解個仔，同覺得佢成熟咗好多。

出乎我意料之外，佢第一句答我，就是說'我知道你諗乜'。😯，我心諗我都未諗你又知我諗乜。然後我就問佢，咁你覺得我諗乜？佢回答'想省錢'。我當然唔會咁諗，之後我哋就傾左一陣我小小嘅理財觀。

之後我就同佢分析，轉校嘅目的，只係想幫佢篩選同學。
我同佢講，不如轉一間有精英班嘅學校，因為我相信，經過好多努力然後進入精英班嘅同學，壞行為嘅比例應該相對較少，比較有紀律，而且相信整個小學時期精英班嘅同學應該都係同一班人，只有好少比例嘅人改變。

佢答我，唔想入精英班，因為壓力太大。

之後我又俾另外一個建議佢，唔使任何努力已經可以名列前茅，輕易考第一，冇任何壓力。
就係揀一間成績相對冇咁好嘅小學。
入咗去，可以輕鬆咁考得好好，可以攞好多奬，好開心。
我以為佢會答我好喎，就咁決定。

然後佢答我，咁中學呢大學呢，梗係唔得啦。

其實道理好多人都明白，根本唔需要去解釋咁多。

最後結論，既然你改變唔到宜家嘅野，就要努力咁面對，研究下點樣同唔同人相處。