個仔放學之日常事

 好耐冇更新過嘢，又寫下先。

～你每日做啲乜，直接塑造你成為什麼樣的人～

課外活動同上年一樣都係打波捉棋同埋音樂，所以都係好忙，唔打波嘅日子就會捉棋音樂。上篇講到不斷找尋大家嘅平衡點上了解及調節，到底有冇改變？

尋日個仔學校練完波，太夜坐唔到校車，所以由我載佢返屋企一程，基本上一個禮拜練兩次波都係我車佢返屋企，我通常喺車度都係聽緊Podcast，所以比較少傾偈，落車的時候，仔仔好自然地同我講了句：唔該曬。

～感恩，短短的一句十分暖心。～

咁返到屋企，佢當然係第一時間沖涼，沖完涼順手放晒啲衫落去洗衣機開機洗，自己的家務自己做。負責自己，分擔家務，有時幫手洗菜，一片片咁搣又要切，我聽過佢講左句：原來洗菜都唔係咁易。

～了解別人的給予、付出、提供，十分重要。～

食飯係休息嘅時間，通常都會傾吓偈睇一陣新聞，睇吓YouTube睇吓劇集放鬆吓。

最近梗係睇Disney+ Moving異能，睇完就梗係睇Loki Season 2.

～嘻嘻哈哈最重要。～

記得好耐之前曾經有一次，個仔話瞓得唔好，所以約定了臨瞓前半個至一個鐘，會係睇書時間，熄晒所有電子產品及電視機。臨瞓前睇書，幫助穩定情緒準備瞓覺。

之前寫過，一個人係周圍的人的平均值，除咗老師同學父母，讀多一些好書，增加思考、智慧、經歷和情感，有助提升你嘅平均值雖然父母令佢降低了一點🤣。

佢啱啱睇完Jordan Peterson - 12 Rules for Life: An Antidote to Chaos. 

啱啱開始另一本Mihaly Csikszentmihalyi - Flow: The Psychology of Optimal Experience

啱啱開始，佢就話已經諗定下一本想睇嘅書了。

～好書入邊包含最智慧、最深刻、最敏銳、最豐富、最博學的的資料，就好似識到一個新朋友一樣咁開心。～

咁功課呢?當然係佢自己做啦。

其實我真係好少見佢做功課，每次都係做一陣就話做完，就算未做完太夜，佢一定會準時瞓覺同埋校鬧鐘早啲起身做。

既然佢都自己做好晒，我都冇嘢好寫，所以寫住咁多先。