2018年的願望．make it fun

2017年的願望是被個仔帶領我走進知識的寶庫，佢今年最後一天教我嘅字係：thesaurus（辭典）- inside words with similar meanings are arranged in groups。本來我聽唔清楚，叫佢串俾我聽，居然識拼讀出來，然後真係俾佢串叫我用多點。

到2018年的願望啦，是開心和遊戲中學習，繼續玩、玩同玩。我相信只有佢感覺有興趣的，應該會學得更好更多，所以主題會係「how to make it fun」，如何學得更開心快樂。

希望個仔做任何事都可以好似背英文詩咁遊戲中學習

http://mykidnme.blogspot.com/2017/06/blog-post.html

至於教育基金方面，今年增加了+50萬以上收益，是年度增長紀錄新高，希望可以繼續平穩增長，現：公用35%、銀行30%、工業零售20%、債券10%、餘下REIT及黃金5%。

下年加息週期及美國減稅真係一個充滿挑戰的一年。

如何令小朋友一早做好假期功課？

一份功課寫住「NOTE: This holiday homework is optional」，過兩天才開始聖誕假期，但個仔同我講話已經可以交功課了。咁⋯即係未放假就做曬功課，are you kidding me? 😮

有一天我聽電台節目，女主持人話習慣假期開始一早就做好功課，而且覺得理所當然，可是男主持人卻表示到假期最後最後迫於無奈才開始，男人是用死線工作。

果然男女大不同。

我身為男人，十分同意，女人視功課為責任，而男人卻以玩樂優先。我覺得是心裡想做，卻不能專心，坐唔定。

沉悶磨滅意志。

過兩天才開始放假，未放假就做曬功課，原來係

好玩令人專注。

見到依份功課，我開始明白一啲野：

我諗，到假期完，個仔可能會做曬所有可選擇的方格，

原本困難既假期任務就咁完成了，非常奇妙。

別讓自己圍住小孩嘅世界而轉動

本來呢度淨係諗住寫兒子，希望提醒自己關心佢多啲，但⋯

今天我的媽媽打了電話給我，傾計傾了一個幾小時，我耐心聆聽佢講每一句說話，傾左個幾鐘頭之後，我的心情有一點點失落⋯

回憶係我結婚之前，我們還住在一起的時候，我每天和她傾計，她思考的反應快速，你一言我一語十分開心。現在不知道是我的世界快了或是她的世界慢了，或者是太少人太少機會與她互動，反應速度慢了⋯

結婚之後我搬咗出去，真係少咗時間和父母見面，所以每年的家庭旅行我也會邀約父母一同同行，已經實行連續好幾年了，除了每年的家庭旅行之外，每個星期半日的父母家庭日外，我也希望抽多點時間，畢竟自己的孩子每天也會見面，自己的父母反而沒有。

自己的孩子需要自己的時間，同樣自己的父母也需要你的陪伴。

同時自己也有很多野想學習，很多野想做，自己也有自己的人生。

或許從今天開始，可從愛錫及照顧自己、伴侶和父母多一點開始...

希望自己不要忘記，身教的重要性。

究竟個仔係咪讀書嘅材料？

原本在我眼中，小兒是一個好多缺點的男孩，膽小怕羞、被動、情緒化嘅男仔。

但，睇一個人唔係睇而家嘅狀態，而係睇吓佢嘅可進步嘅幅度和動力、有沒有一些可取嘅特質。

人生嘅路好漫長，起步如何並唔重要，反而係睇吓佢每日正在做些什麼。

我成日不停諗個仔係咪讀書啲材料、進度係咪理想、究竟間學校啱唔啱佢、有冇啲學校更適合佢⋯

當你在懷疑的時候，你就會諗辦法去驗證，究竟「我點樣知道我做得或者選擇正確」，究竟我覺得有乜野特質係最重要。

究竟以前同而家嘅分別係點，有乜嘢我係覺得重要嘅能力同習慣，舉一兩個例子：

講嘢能力：

以前，你問佢10條問題每條問題都可以回答你‘哦、哦、哦’，一字起兩字止。

現在，你問佢一句佢答你10句，講嘢講唔停。

睇書習慣：

以前，你叫佢睇書，你奬賞佢，佢先會係咁意敷衍下睇一陣。

現在，一起床就見佢睇緊書黎，你叫佢唔好睇住食完早餐先，佢話睇埋先差少少，仲會游說你一齊睇，點解咁好睇。

在學習上，可以慢慢進步。而同一時間運動同埋團體精神我都覺得好重要。

但其實最最最重要嘅就係令佢覺得自己係優秀嘅。

做一個優秀嘅人，永遠都會覺得自己不夠，會有一個動力，推動自己不斷向前⋯

附注: 話說前兩日返咗屋企見到個仔對家傭呼呼喝喝，一啲禮貌都無，我第一時間同佢講「姐姐係負責幫助做家務，並不是用來俾你呼喝的，如果你請求她幫手，請你要有禮貌，語氣要客氣一點，如果唔係我會唔喜歡你，同時我也會對你好失望！」

一個冇內涵冇修養唔識感恩嘅人，就算你幾成功都會令人看不起你。

解決問題的思考方向

又係時間寫無聊野。

老婆尋日話佢嘅朋友個小朋友有讀寫障礙，嚴重影響學習。我話我都有讀寫障礙喎，我細個睇唔到書，成日唔合格考第尾，最後也是可以大學畢業，叫她多鼓勵下她朋友的小朋友不用氣餒。

有問題其實係諗方法解決，總有辦法。

最近上網學習，哥爾夫球改善姿勢，學到一樣新視野，一般情況打波都係着重上身姿勢嘅改善，打波嘅姿勢角度嘅調整，但一直都忽略下身嘅影響，原來做啱下身用力嘅方法就可以直接影響上身嘅擺動方式從而影響打波姿勢，先以下身嘅擺到去牽引上身真係諗都未諗過。

呢樣學到嘅嘢除咗影響我嘅哥爾夫球之外，其實最重要仲直接衝擊左我平常解決問題同思考嘅視野方式。

令到我做嘢工作上解決問題事更上一層樓。

不過呢度都係講返個仔先，舉個例子，再同個仔研究寫字醜樣嘅問題，搵到最根本性嘅原因。

以前曾經同佢做過幾樣野，包括小肌肉嘅練習、字帖嘅訓練、速度嘅訓練等等，最後發覺結果都未如理想，原來真真正正係無人教過佢點樣去寫一個靚嘅整齊嘅字，佢根本唔明白點樣運用空間同埋角度去完成一個整齊嘅字睇得明嘅字，最後我同佢玩左一連串嘅遊戲，其中包括：

空間：我用圓形三角形正方形同長方形同佢玩個遊戲放係一個正方格擊中正中心點樣去排得好整齊，最後佢可以明白點樣將唔同嘅物件平均咁放一個正方形。

角度：一個飽滿圓潤嘅a、e、o、u嘅重要性，點樣去下筆又同佢玩一輪。

等等.....真係希望佢最後可以寫清楚D字。

雖然我都已經好少理個仔嘅功課，但也會睇返佢寫啲一句日記真係好好笑，佢睇嘅書越來越快又會睇自己以前唔鍾意嘅書，真係一個突破。

希望佢可以可以不斷突破自己啦。

仔仔教學系列：如何用橡筋整雙星

今日叫個仔教我用橡筋整雙星
How to make a double star with rubber band

講英文流暢了很多，
與3月時偷錄片段，進步了很多。
http://mykidnme.blogspot.hk/2017/03/blog-post_23.html?m=1

父母的影響力．職業生涯的規劃

今日聽了一個故事

有兩個同學入了倫敦帝國大學MEng Civil Engineering，他們擁有共同特點 : First Class Honours degree，也是一等榮譽學位畢業（點解這裡要強調一級榮譽畢業呢，就係這種人對自己有強烈嘅自我要求）。但有個不一樣父親：一個父親是專業人士，

另一個的父親是做工廠廠長。

結果：時間一天天過去，兩位同學一個在跨國公司晉升到總經理嘅職位，另一位成立了公司當了老闆，生意越做越大，到底是什麼影響了他們的職業選擇？

父親的影響力：

兩位留學的同學，每月也會收到家裡寄來的生活津貼。當專業人士的父親，每月準時地發給兒子現金作生活開支。

而當廠長的父親，突然有一次暑假寄了一個大紙箱給兒子，在紙箱上大大隻字寫着「兒子這是今個月給你的生活費請打開」

原來紙箱裏是工廠生產線出來的珠耳繩，成本大約數百元，父親請兒子把成品賣掉以作生活費之用，什麼提示也沒有給自己的兒子，一開始兒子定價也不知道如何定，到底應該賣多少錢到底在哪裏賣，毫無頭緒。

到後來慢慢找到方法找到渠道，每次與同學穿州過省旅行也會帶一小箱貨物去賣，一到一個新地方，就會跟他的同學講一聲：「你們先去玩，我把這些貨物拿去賣，一會兒在酒店等一起晚飯」然後進入一間間商店很快就把貨物賣完回酒店，也同時留下新的聯絡資料待將來需要補貨的時候，回去後把貨品寄出，很快生意就越做越大。

這裏不是要評論做生意好定係打工好，原來父母很簡單的一個動作可以有一個好深遠嘅影響，不容小覷。

中秋節功課．日記：一個特別的要求．同個仔打網球

這個中秋假期特別多活動，又日營、又踏單車、又賞月、又打網球，每次都跟不同的人在一起，比較特別。在活動中與其他不同學校小朋友談到這個假期最難的功課是什麼，不約而同都說是「作文」，不論中文或是英文，往往會以「規定字數」這樣最簡單的方式，有些要求的數字少些，多數是在數字上的要求，反而比較少在內容上有特別嘅要求。

一般作文要求小朋友分段寫作，大致上也是分開3至4段內容。第一段開頭、第二三段主要內容、最後一段感想。

但今次日記作文有一些內容上特別的要求令我感到十分有趣。

在4段內容上有兩個比較特別嘅要求：第一個要求，在第3段要求寫出最難忘最特別嘅事情，呢個要求雖然好正但我唔寫咁多啦，因為我寫呢篇嘅時候個仔仲未做晒。

我反而想寫第二個要求，在第一段開始嘅時候，一般嘅日記，會直接寫「時、人、地、事」然後馬上開始寫第2段，但今次個仔同我講，有一個很特別的要求，不可以順序寫「時人地事」然後開始，即係話唔可以直接寫「今天是農曆8月15號中秋節天氣特別晴朗我們約了其他同學一齊去踩單車...」

結果，就係一個咁嘅特別要求，個仔第一段已經寫咗約150字。

「嚄嚄～～咿咿～～一些奇怪的聲音吵醒了我，原來是媽媽的鼻鼾聲！我打了一個大呵欠，揉揉我的眼睛，打開窗簾看到刺眼的陽光照射進來，當我看清楚的時候，發現外面正在下着雨。我看看時鐘說：「媽媽你忘記了嗎？」她立刻彈起來。我說：「今天是十月四日中秋節，我們約了同學踏單車，現在是九時正。」「九時正？」她說，「我們約了十時正在西九文化區等！」

希望個仔以後寫日記都可以記住呢種特別嘅開始，特別好看，期望他早點完成這份功課！

—

個仔打波，無論乒乓波羽毛球網球，大部份球類都識。

今次同個仔對打網球，又真係好開心，所以我決定每個星期都同佢打一次波。

有機會會教佢我最鍾意嘅哥爾夫球。

「讀書時讀書遊戲時遊戲」「Work hard Play hard」

家裏的小老師

個仔突然對住我講「你話你鍾意聽我教你野，所以我特登記住返嚟教你架」，唔知點解我特別鍾意聽個仔教授學問。

聽一個小學3年級的小朋友返到屋企細說學校發生嘅事，其實都一個唔錯嘅體驗，但可惜一個男孩子並沒有像一個女孩子這麼喜歡分享生活細節，於是我告訴個仔希望聽佢每日教我一樣野，不限範圍，無論深淺，我都鍾意聽。

於是個仔昨天突然間同我講「爸爸，教你樣嘢」（其實我已經遺忘左嘅希望，但是他記在心中並且實現，我心裏突然覺得開心一下）

接着他繼續說：

Yodeling - Ar Ar O E OO.. Yo OO E OO..

我以為佢教我英文，原來他教我音樂。

Yodeling (also yodelling or jodeling) is a form of singing which involves repeated and rapid changes of pitch between the low-pitch and the high-pitch

"Yodel – Ay – EEE – Oooo"

約德爾唱法（Yodel），又稱約德爾調、岳得爾歌，是一種伴隨快速並重複地進行胸聲到頭聲轉換的大跨度音階的歌唱形式。產生一串高-低-高-低的聲音。

—

原來除咗係屋企睇書，學校帶返黎嘅書，佢每一日係學校都有到圖書館借圖書睇，真係難得。

—

病假．假病

我剛剛病假在家，個仔放學後，俾我見到一個字，於是虛心請教個仔，教我一個字「malinger」

佢回答話意思係：

To pretend to be ill in order to avoid having to work

我嘅理解：即係扮病

十分應景特別入腦，又學到野。😎

寫字醜樣的問題v3

個仔寫字醜樣不停纏繞着我：

字醜的問題第一階段

http://mykidnme.blogspot.hk/2016/11/blog-post_55.html?m=1

字醜的問題第二階段

http://mykidnme.blogspot.hk/2016/12/blog-post_22.html?m=1

經過兩個階段之後，觀察所得發現個仔寫字一時好靚一時好醜。

其實佢可以寫字寫得好靚，但佢根本係冇心機（唔知點解要寫咁靚），又或者係冇時間（快快手做完就去玩啦）。

我都好明白身為一個男仔，啲嘢做完咪算囉，整咁靚做乜姐。可惜，有時啲字真係核突到我容忍唔到。

經過一年時間之後我決定咗進入改造第三階段：「強化基礎」。

為左加強訓練個仔嘅小肌肉，於是堅持買入個仔未必鐘意嘅嘢，仲叫佢玩這個一般都係女仔鐘意玩既玩具：拼拼豆豆。

一個唔單止練習小肌肉的遊戲，同時也考驗耐性、想像力、創意的小玩意。

希望這小小的大豆小豆，幫到手啦。

一邊玩耍，一邊進步。

英文書 The 91-storey treehouse

今日收到91層樹屋，第一時間睇返之前寫過啲乜嘢

http://mykidnme.blogspot.hk/2017/01/78-storey-treehouse.html?m=1

「今天買了最新一本The 78-storey treehouse，

個仔收到時，好開心地俾左2個反應：

第一個反應：嘩，有375頁，正呀！

第二個反應：The 91-storey treehouse 八月份我生日月份出新啦（已經好期待咁樣）。

典型嘅未睇先興奮😅

其實佢今天學校農曆新年派對，玩完就開始另一個悠長假期，下午去左圖書館借咗8本書....」

到今年啦終於收到最新一本The 91-storey treehouse
個仔收到時，好開心地俾左2個反應：
第一個反應（超級興奮）：嘩，厚左好多呀，有362頁（註：最近佢都係睇緊大約100頁厚左右嘅書，所以覺得樹屋本書厚咗好多）
第二個反應：就係冇咗反應15分鐘，叫極都冇反應，攞住本書係咁睇（已經有一段時間冇書可以令到佢咁樣，樹屋係現在唯一一本書仲可以令佢仲咁想去追嘅一本書）

最後我哋叫佢夠鐘瞓覺，強制性叫佢停止。

人生就係不斷嘗試．選擇的思維

一年一度問轉校又黎啦：

話說升小學果時，個仔話好想同幼稚園同學一樣屋企附近小學上學，而我好想他在雙語環境的新學校上學，結果我跟他說嘗試一年，約法三章，一年後如果他不喜歡新學校，我會幫他轉回屋企附近的小學上課，結果他答應了嘗試。

第一年過去了，我問他什樣，他回答希望繼續讀下去，不需要轉回屋企附近的小學。
第二年過去了，我問他轉校，他回答好想繼續讀下去，不想轉校，一直讀到中學完結。
而我每年會一直問落去。

人生其實都係一樣，你唔嘗試過，你唔會知道鐘唔鐘意。
唔嘗試過，你唔會知道能唔能夠，了解唔到自己的能力。

我知道選擇應該是了解後決定才有意義的。
所以在我問他選擇前，我也希望儘量令他多角度及不同來源了解不同學校的分別。
如果佢話想轉回，我真心會答應的。

但似乎他越讀越開心。

其實做人簡單點，停留在這裡，個仔會很開心滿意，正如當初只上屋企附近小學一樣，但你不同的選擇，就會有不一樣的將來。

到底如何選擇，我最後也是希望，自己的人生最後應該也是自己決定，但應該懂得分析選擇。

選擇嘅對錯並不是最重要，反而我希望影響孩子懂得多角度不同來源了解事情後選擇的思維。有

--
今個暑假個仔同同學仔去學溜冰，溜冰返嚟我問個仔溜冰好唔好玩啊？佢答我唔好玩。
好難溜，個個都識得佢唔識。
其實我心諗，學習從來都唔係一件好玩嘅事，到你識左又係另一種境界。唔鍾意咪唔好繼續學。
然後我繼續同佢講，到你學識左我哋遲啲去滑雪或者你想玩冰上曲棍球果時就好需要識溜冰，始終識咗都係一件好事。

有時，睇遠啲你就會明白。

成績表．成績以外

今天在老師手上接過兒子的成績單，成績大幅進步，在我們家中特設的禮物績分表中，由上學期160，上升到320。

老婆馬上充滿期望地跟個仔講「我最希望你可以得到學科獎」。沒錯，可以得到學科獎固然是錦上添花，但人生不是短跑比賽，反而是一個耐力賽。

我對孩子說「我最希望不是你可否得到奬項，反而是看到你每次的進步，不斷的成長。我最開心不是你每次一百分，反而是慢慢由低分進步到高分的努力與過程。」

希望你繼續努力，加油！I am proud of you!

回家後，我們也主要分享了他可以在非學術上可以改善的地方，如先行動後思考，不要怕做錯而想太多，衝忙時也需要特別注意禮貌，禮多人不怪等…。

希望他不要忘記成績不是所有，

好品格，好習慣，好態度才是成就人生最重要嘅嘢。
--
今日7月7號，老婆攞咗兩張原諒他77次的戲飛，睇周柏豪同阿Sa ，本來放低個小朋友兩公婆去睇戲拍拖其實都好開心，可惜套戲咁令人傷感，雖然係咁，我覺得齣戲好好睇。同埋周柏豪好靚仔。

努力獎：閲書量全級第一名

今天個仔獲頒閲讀獎，由一個不愛讀書只愛打遊戲機到閲書量全級第一名的男孩，的確不容易的事。

還記得幼稚園時，要求小兒讀書需要用打機或玩耍交換，並一如大部分男孩一樣只有三分鐘熱度，任何事情也不能持續太久，而且還需要大人在旁伴讀支援。

到一年級完結時，才開始愛上閱讀英文chapter books，慢慢愛上閲讀，一邊看書一邊獨自發笑，還會要求看那一冊書及那種類型，但還是對中文書十分抗拒。

直到升上二年級，開始愛上看中文書，還是厚厚的一種。直至，我開始要求他用一點點時間看一看英文書，可以得知他沉迷的情況。

希望他繼續－「愛閲讀」

其實我成日想問他一個問題，究竟你睇書咁快，

到底有冇睇清楚？

到底明不明白的？

小二學習小結．不要輕易放棄中文

其實考完試，我無乜嘢想寫，應該係輕輕鬆鬆等放暑假嘅時候，個仔最近每天返到屋企不外乎玩扭計骰，同睇書，學校借既書唔計，因為中文閲讀計劃已經完成214本。係屋企，中文書睇緊字詞樂園，英文書睇緊Horrid Henry。

但反而今次想寫一寫考試成績，因為見到其他小朋友讀國際學校好似仲開心，所以想寫一寫。雖然成績表下個月先有得拎，但經過了幾次考試後，對個仔成績都心裡有數。

最好一直都係數學，有9x、100分等，但我想講其實低年級嘅數學分數並唔係最重要，因為只要經過簡單操練就可以達到比較高分數，反而係了解佢嘅思考過程，例如簡單啲27-8，答案當然係19啦，個仔可以用進位退位完成，但亦都可以28-8後再減1，其實答案都係一樣，先唔理計算速度，識得咁計已經可以大幅減少錯誤發生嘅機會率。

然後到英文，由細細個開始一直最擔心係英文，因為始終英語都唔會係生活上嘅第一語言，幼稚園同屋企都係用中文為主，需要花時間花心機額外學習，但成績還是都可以meet expectations，而且一年班結束時開始愛上閱讀Chapter books，可以見到二年班開始作文有大幅嘅進步。而且在發音上一年班老師提到的港式英語，漸漸地在二年班慢慢消失，所以英文唔多寫啦。

最後到中文，一直都以為由細細個開始以中文為主，中文都應該不成問題，甚至可以輕易達到中上的成績，但成績反而中文作文係需透過支持達到要求。中文認字都唔係最大問題，反而係結構複雜容易出錯及寫唔出。每日花時間同佢研究中文其實都幾令人氣餒，呢個時候我反而諗起國際學校，其實一個決定轉讀國際學校就可以即時解決晒一大部份中文嘅問題，大人及小朋友即時可以開心晒。雖然有諗過但最後都冇咁做到，其實國際學校中文未必一定會差點，只是印象中輕鬆點。反而經過好多努力，由年頭作文好辛苦寫到兩三行，到現在可以寫到三版400-500字，當中都仲好多錯別字，但對一個二年班嘅小朋友，其實進步都好驚人。以前只會睇英文書，到而家，我返屋企會見到個仔會睇厚厚嘅中文書。

依家睇返，如果當初輕易放棄中文，小朋友便會損失很多中文學習嘅機會，最後我之前最鍾意睇嘅金庸小說同三國演義佢可能都唔會睇。

所以不要輕易放棄中文。

學識扭計骰．魔術方塊．Rubik's Cube

今日個仔終於學識扭計骰，值得記低。

話說考完試後，個仔帶扭計骰返學校玩同分享，嗰時仲未學識，分享他自己3x3扭計骰後，佢啲同學陸陸續續帶着4x4，甚至不同形狀嘅扭計骰返去互相分享研究，嗰時個仔發現原來班上有好多同學已經識扭。佢更同我講校車上面，以佢觀察大約有八成同學已經識扭扭計骰，自此之後，每一日返屋企嘅活動就係積極研究「扭計骰」，務求以最快嘅速度學識，真是有趣。

個仔就係用以上嘅YouTube學識嘅。

但我睇左幾次都未識，Sigh..於是另一個YouTube SCAF。

加多一個8355方法先。

睇落容易啲，岩我學。不過，我都係一如以住，叫個仔教我。

SCAF (Six Cross And Finger shortcut)由台灣的玩家賴寬祐所整理出來的三階魔方解法流程，玩家只需要記憶一個口訣(右上左下)，利用這個口訣就能完成六面魔方，非常適合(兒童、中年、老年人)的思考與學習模式，與8355法不同的是SCAF跳過第一層角塊這項大難關，這大大降低了初學者學習難度。這也是SCAF被整理出來的目的。
而8355法由台灣的許技江老師所規劃出來的解法，強調以理解的方法去解出魔術方塊，期望能消除新手對於「解方塊需要大量公式記憶」的疑慮。

其實背公式就最快架啦，但原來有個教授叫Jessica Fridrich發明左快速完成扭計骰，咁反正要記，當然記個高速嘅方法口啦，睇落都型啲，平均56步，約17秒。
http://www.ws.binghamton.edu/fridrich/ptrns.html

Fridrich Method(簡稱CFOP)其實是層先的變種，但是由於其歸納出了可能出現的各種情況，所以在記憶量上面要增大許多倍（119個公式），但同時也能有效的增加速度。

現在絕大多數魔方高手都使用Fridrich Method，因為相對於它能達到的速度來說，119個公式的記憶量就顯得不多了。

教授網頁：

http://www.ws.binghamton.edu/fridrich/system.html

小一派位．Poem - The Sun

最近FB被升小派位洗版，其實派邊間小學都好，最重要係實地考察，就算俾你派到第一志願都好，都未必同你想像中一樣，也未必適合自己的小朋友。派得唔到好都未必需要傷心，間學校又唔係要你讀一世，唔鍾意咪轉校囉，最重要係了解間學校，了解自己個小朋友。

其實一入學校，先留意學生的表情，再留意老師的熱誠，只要是二缺一，最後就算學校再出名排名再高，我也會選擇放棄，我就曾經試過，之後睇返覺得我嘅選擇係啱嘅。

選擇學校也不應過早為小朋友設限，每個小朋友也有很多未被發現的潛能，低估了他們當然會令他們樂於活着舒適區中，但難有較大的突破和進步，只有與高手過招才會明白及快速地成長進步。

最後記低返個仔開心自發地遊戲中背了果首英文詩嘅成果：

Poem: The Sun by Gareth Lancaster

背英文詩

其實今個禮拜係考試週，今日係考試嘅最後一日，諗住返到屋企會見到個仔喺度玩，點知佢喺度背緊英文詩，嚇我一跳。

其實日日返到屋企都會見到個仔喺度玩緊，考試週可以係屋企玩唔使溫書，聽落簡直天方夜譚，偏偏就係出現係我哋屋企，其實我都希望每一次測驗考試佢都可以開開心心咁玩，成績又唔使我哋擔心。

好，言歸正傳，係我嚇咗一跳嘅時候，
個仔繼續講「爸爸我背緊英文詩呀」
我問佢「點解你可以背得咁開心？」
個仔答「因為我研究到可以遊戲讀書法，一邊玩遊戲一邊背詩」

好嘢，讀書讀得咁開心，爸爸真係服左你👍🏻

課外活動記錄表v1

整個表記錄下個仔嘅課外活動，透過不同課外活動（運動為主，因為他熱愛運動，而且男孩應該要更加茁壯成長），讓他更加了解自己。

經過不斷篩選後，只有十分喜愛的活動可以留低，由一星期一次慢慢增加次數。不喜歡的活動將會取消（包括他說喜歡但我觀察後認為他不喜歡的鋼琴、求生用的游泳但他要證明他游得很好才可取消），不會加入恆常的活動包括一早知他討厭的畫畫、話劇等。

課外活動 記錄表 v1
	持續時間	水平	喜愛程度	備注
跆拳道	恆常	紅帶	一般	保護自己為主、5月28日
游泳	恆常	四式	抗拒	求生為主、自由式背泳蛙式蝶式
網球	恆常	初階	十分喜愛	值得增加次數，唯暫決練習地方
打鼓	恆常	2級	喜愛	手腳加左右腦訓練
足球	恆常	進階	喜愛	校內羣體活動
少年軍	恆常	初級	一般	校外羣體活動
溜冰	暑假	入門	未知
劍擊	暑假	入門	未知
花式跳繩	暑假	入門	未知
田徑	暑假	入門	未知
乒乓球	暑假	入門	喜愛
網球	暑假	加強	十分喜愛	要求增加
棍網球 Lacrosse	暑假	入門	未知
運動攀登	暑假	入門	未知
冰上曲棍球			未知	投考選拔中6月
羽毛球	不定期	進階	喜愛	有天份
籃球	不定期	初階	喜愛	下手投籃
踩單車	不定期	兩輪	喜愛	剛學識
鋼琴	二年	2級	一般	已停，觀察後認為他不喜歡
撲克	不定期	初階	喜愛	鋤大D
棋類	不定期	進階	喜愛	國際象棋, 中國象棋, 圍棋, 等
滑板車	不定期	玩耍	喜愛